“Financial Times” басылымының сәрсенбі күні украиналық және еуропалық шенеуніктерге сілтеме жасап хабарлауынша, Украина президенті Владимир Зеленский президенттік сайлау мен референдум жоспарын 24 ақпанда жариялауды жоспарлап отыр.
“Reuters” агенттігі өткен аптада АҚШ пен Украина келіссөз жүргізушілері талқылаған негіздеме аясында кез келген бейбіт келісім референдум арқылы Украина сайлаушыларының қарауына ұсынылатынын және сайлаушылардың бір мезгілде ұлттық сайлауда да дауыс беретінін хабарлаған. Агенттік сондай-ақ шенеуніктер ұлттық сайлау мен референдумды мамыр айында өткізу мүмкіндігін талқылағанын мәлімдеді.
Ресей бұған дейін Киев сайлау өткізген жағдайда қауіпсіздікке кепілдік беруге және Украина аумағының ішкі жақтарына шабуыл жасамауы мүмкін екенін айтқан. Ресей президенті Владимир Путин сондай-ақ Ресейде тұратын Украина азаматтарының да дауыс беруі тиіс екенін атап өткен.
Украина президенті Владимир Зеленский сенбі күні жасаған мәлімдемесінде АҚШ-тың Мәскеу мен Киев арасындағы шамамен төрт жылға созылған Ресей-Украина соғысын «осы жаздың басына дейін» аяқтауды ұсынғанын хабарлады.
АҚШ президенті Дональд Трамп қаңтардың соңында Ақ Үйде журналистерге Зеленский мен Путин арасындағы жеке және саяси өшпенділіктің қақтығысты тоқтату әрекеттерін қиындатып отырғанын айтқан.
Соңғы апталарда Ресей мен Украина елшілері арасында АҚШ-тың арағайындығымен өткен келіссөздер екі тараптың шенеуніктері тарапынан сындарлы әрі оң деп бағаланды, бірақ негізгі мәселелер бойынша ілгерілеу бар екеніне ешқандай белгі жоқ.
Зеленский бейсенбі күні бейбіт келіссөздер жақын болашақта жалғасатынын білдірді.
