Бейсенбі күні кешке АҚШ-тың Миннесота штатында наразылық білдірушілер федералдық құқық қорғау органдарымен қақтығысты. Миннеаполисте қызметкерлердің бір апта ішінде екінші рет қарулы қақтығысқа араласуынан кейін қалада вандализмнің кең тарағаны және химиялық заттардың қолданылғаны туралы хабарлар түсті.

Оқиғаға қатысты кадрларда полицияның көзден жасаурататын газ бен дыбыс гранаталарын қолданғаны, сондай-ақ агенттер пайдаланған болуы мүмкін көлікке қоқан-лоққы сипатындағы жазулар жазылғаны көрінеді.

Қаладағы шиеленіс Ішкі қауіпсіздік министрлігі (DHS) сәрсенбі күні Иммиграция және кеден қызметі (ICE) агентінің ұстау әрекеті барысында венесуэлалық азаматқа оқ атқаны расталғаннан кейін күшейе түсті.

Әлеуметтік желілерде тараған бейнематериалдарда федералдық қызметкерлер пайдаланған болуы мүмкін көлікке қызыл бояумен «Жақсы агент — өлі агент» деп жазған адамдар көрінеді.

Терезелері сынған, сыртқы панельдері зақымданған көлік ICE-ке қарсы ұрандармен қапталған.

Полиция басшысы Брайан О’Хара оқиғалардың «заңсыз әрекеттерге» ұласқанын, қызметкерлерге отшашулар лақтырылғанын айтып, осыған байланысты құқық қорғау органдарының көпшілікті тарату үшін дыбыс гранаталары мен көзден жас ағызатын газ қолданғанын мәлімдеді.

“Associated Press” агенттігінің хабарлауынша, бұл оқиғалар өткен аптада АҚШ азаматы, үш баланың анасы, 37 жастағы Рене Николь Гуд ұлын мектепке апарғаннан кейін ICE агенті тарапынан атып өлтірілген соң басталған. Жергілікті билік өкілдері штатқа мыңдаған федералдық агент орналастырылып жатқан жағдайда «өзін-өзі қорғау» ұғымын ақтау ретінде қолдануға болмайтынын айтты.