33 жастағы демократиялық социалист Зохран Мамдани Нью-Йорктегі Демократиялық партияның праймеризінде жеңіске жетті. Егер сайланса, қаланың алғашқы мұсылман мэрі болмақ.
Оның басты қарсыласы, Нью-Йорктің бұрынғы губернаторы Эндрю Куомо нәтижелерді қабылдап, «Бүгін оның түні. Ол бұған лайық. Ол жеңді», - деді.
Көптеген сарапшы праймеризде ешбір үміткердің басым дауыс жинай алмауына байланысты нәтижесі реттелген таңдаулар жүйесі бойынша анықталады деп күткен болатын.
Мамданидің сайлау науқанының менеджері Элле Бисгаард-Черч: «Әлдеқайда жақсы, әрі қол жетімді болашаққа деген көзқарасымыздан шабыт алып, сайлауда рекордтық дәрежеде дауыс берген барлық бес аудандағы сайлаушыларға шексіз алғысымызды білдіреміз», - деді.
Куинстің 33 жастағы депутаты Мамдани бұған дейін аса танымал емес еді, алайда вирус секілді таралған науқандар мен жастар бастамасымен құрылған прогрессивті қозғалыстың арқасында саяси ортаны таңғалдырды.
Мамданидің жетістігі бес аудан тысында да резонанс тудырды. Оның батыл платформасы мен ашық солшыл ұстанымы жоғары деңгейде талқылануда.
Үш мерзім штат депутаты болған Мамдани жас сайлаушылардан кең қолдау алса да, шектеулі тәжірибесі, полиция мен тұрғын үй саясатына қатысты ұстанымдары және Израильге қатысты ашық пікірлері үшін кейбір сайлаушылар тарапынан сынға ұшырады.
Сайлаушылар аптап ыстық кезінде дауыс берді. Сауалнамалар Зохран Мамданидің 67 жастағы бұрынғы губернатор Эндрю Куомоны басып озғанын көрсетті.
Республикалық партия алдын ала сайлау өткізбей, 2021 жылғы Республикалық партия үміткері Кертис Слиуаны тағы да кандидат ретінде ұсынды.
2025 жылдың 4 қарашасында өтетін мэр сайлауы Кертис Слиуа, Зохран Мамдани және екінші рет тәуелсіз үміткер ретінде бақ сынап жатқан Эрик Адамс арасында өтпек.
