Ресей Сыртқы істер министрі Сергей Лавров АҚШ Мемлекеттік хатшысы Марко Рубиомен кездесіп, Украина дағдарысын талқылады.
Ресей Сыртқы істер министрлігінің мәліметінше, Лавров пен Рубио Манилада өткен Оңтүстік-Шығыс Азия мемлекеттері қауымдастығының (ASEAN) іс-шаралары аясында кездесті.
Кездесу барысында Украинадағы жағдай талқыланды. Лавров америкалық әріптесіне майдан шебіндегі нақты ахуал туралы ақпарат беріп, «Еуропа елдерінің Киев билігін қарумен қолдау арқылы Ресейді стратегиялық тұрғыдан жеңіліске ұшыратуға бағытталған тұрақсыздық туғызатын саясаты қабылдауға болмайды» деді.
Сондай-ақ Лавров Ресей тарапы мәселені саяси және дипломатиялық жолмен шешуге ашық екенін және 15 тамызда Аляскада өткен саммитте қол жеткізілген уағдаластықтарды ұстанатынын растады.
Кездесуде өңірлік және халықаралық мәселелер де талқыланып, тараптар Парсы шығанағындағы жағдай жөнінде пікір алмасты.
Екіжақты қарым-қатынасты жақсарту үдерісі де күн тәртібіне шығарылып, Ресей мен АҚШ-тың дипломатиялық өкілдіктерінің жұмыс жағдайын жақсарту мәселесі қаралды.
Лавров пен Рубио Ресейдің «Роскосмос» мемлекеттік корпорациясы мен АҚШ-тың Ұлттық аэронавтика және ғарыш басқармасы (NASA) арасындағы байланыстардың қайта жанданғанын құптап, екі ел парламенттері арасындағы ынтымақтастықты дамытуға қолдау білдірді.
