Украинаның Төтенше жағдайлар жөніндегі мемлекеттік қызметі бейсенбі күні Ресейдің Киевке жасаған шабуылдары салдарынан екі адамның қаза тапқанын, сондай-ақ бір баланы қоса алғанда кемінде бес адамның жараланғанын хабарлады.

Украина Әуе күштері көптеген баллистикалық зымыранның жақындап келе жатқаны туралы ескерту жасағаннан кейін “AFP” агенттігінің Киевтегі тілшілері бірінен соң бірі болған жарылыстардың дыбысын естіген.

Елорда аспанында бірнеше жарқыл байқалып, артынша қатарынан жарылыс болды. Киев мэрі Виталий Кличко бейсенбі күні “Telegram” желісінде: «Жау шабуылы салдарынан Киевте екі адам қаза тапты», – деп жазды.

Украинаның Төтенше жағдайлар жөніндегі мемлекеттік қызметі бес адамның жараланғанын, сондай-ақ Святошинский және Дарницкий аудандарының шабуылға ұшырағанын мәлімдеді.

Бұған дейін мэр Кличко әлеуметтік желіде шабуыл салдарынан бір қоймаға соққы тигенін және «зымыран сынықтары тұрғын емес ғимараттардың үстіне құлағанын» хабарлаған болатын. Сонымен қатар оның айтуынша, Украинаның солтүстік-шығысындағы ірі қала Харьков та шабуылдаушы дрондардың нысанасына айналған.

Шабуыл Еуропалық комиссияның төрағасы Урсула фон дер Ляйеннің қорғаныс саласындағы ынтымақтастықты нығайту мақсатымен Украинаға жасаған сапарынан бірнеше сағат өткен соң жүзеге асырылды.