Түркия Республикасы Сыртқы істер министрлігінің мәліметінше, Түркия мен Испанияның сыртқы істер министрлері Хакан Фидан мен Хосе Мануэль Альбарес Буэно телефон арқылы сөйлесіп, Израильдің Газаға көмек флотына жасаған заңсыз әрекетіне қарсы «халықаралық қауымдастықтың ортақ ұстаным танытуы» қажеттігін атап өтті.

Сыртқы істер министрлігінің баспасөз хатшысы Өнжү Кечели бейсенбі күні Хакан Фидан мен Хосе Мануэль Альбарес арасындағы телефон әңгімесінен кейін мәлімдеме жасады. Ол «Телефонда халықаралық су айдынында жүзіп бара жатқан «Жаһандық Сумуд флотына» Крит жағалауында Израиль күштері тарапынан жасалған заңсыз операцияның әртүрлі ұлттардан тұратын көптеген бейбіт азаматтың өмірін қатерге тіккені және халықаралық құқықты бұзғаны атап өтілді», — деді.

Кечели екі министрдің «халықаралық қауымдастықтың бұл заңсыз әрекетке қарсы бірлескен ұстаным ұстануы керектігіне» тоқталғанын да қосып өтті.

Израиль әскери-теңіз күштері сәрсенбі күні кешке Газаға қарай бағыт алған және аймақтағы ұзаққа созылған блокаданы бұзуды мақсат еткен флот кемелерін тоқтатты. Топтың мәлімдеуінше, Израиль күштері Крит аралы маңындағы халықаралық су айдынында конвойды қоршауға алып, байланысты үзген және бірнеше кемені тәркілеген.

Газаға гуманитарлық көмек тасымалдаған флот Израиль блокадасын бұзуды және теңіз арқылы гуманитарлық дәліз ашуды көздейді. Бұл әрекет израильдік БАҚ-тың «Израиль әртүрлі елден келген 100-ге жуық белсендіні тасымалдайтын және жалпы саны 100-дей қайықтан тұратын флотты тоқтатуға дайындалып жатыр» деген хабарынан бірнеше сағат өткен соң болды.