Қазақстан президенті Қасым-Жомарт Тоқаев Германиямен жалпы құны 2 миллиард долларға жететін коммерциялық келісімдерге қол қойылғанын мәлімдеді.
Қазақстан президенті әкімшілігінің хабарлауынша, Германияға ресми сапармен барған Тоқаев ел астанасы Берлинде Германия канцлері Фридрих Мерцпен кездесті.
Кездесу барысында тараптар Қазақстан мен Германия арасындағы жан-жақты ынтымақтастықты нығайтуға ниетті екенін білдірді.
Тараптар екі ел арасындағы ынтымақтастықты өнеркәсіп, стратегиялық маңызы бар минералдар, көлік және логистика, цифрлық технологиялар, сондай-ақ автокөлік өндірісі және химия өнеркәсібін сияқты қосылған құны жоғары өндіріс салаларында дамытуға зор мүмкіндік бар екенін атап өтті.
Сонымен қатар тараптар әсіресе «Орталық Азия – Германия» форматы аясында және халықаралық ұйымдар шеңберінде ынтымақтастықты кеңейтуге уағдаласты.
30-дан астам коммерциялық келісімге қол қойылды
Тоқаев пен Мерц келіссөздерден кейін бірлескен баспасөз мәслихатын өткізді.
Қазақстан президенті Қасым-Жомарт Тоқаев баспасөз мәслихатында жалпы құны шамамен 2 миллиард долларға жететін 30-дан астам коммерциялық құжатқа қол қойылғанын хабарлады.
Келісімдерді тиімді жүзеге асыру екі ел арасындағы ынтымақтастықты одан әрі нығайтатынын атап өткен Тоқаев Германияға сапарының келесі кезеңінде Баварияға барып, жоғары лауазымды тұлғалармен кездесетінін айтты.
Тоқаев сондай-ақ сапар аясында өтетін Қазақстан – Бавария технологиялық форумына қатысатынын мәлімдеді.
Мерцті Қазақстанға шақырды
Тоқаев келіссөздер барысында өңірлік және жаһандық күн тәртібіндегі мәселелер де талқыланғанын айтты. Президенттің айтуынша, кез келген қақтығыс бейбіт және дипломатиялық жолмен шешілуі керек және бұл – екі елдің ортақ ұстанымы.
Тараптардың «Орталық Азия – Германия» форматындағы диалогты дамытуға да уағдаласқанын атап өткен Тоқаев Қазақстанның Германиямен ұзақ мерзімді, өзара тиімді әрі нақты нәтижелерге бағытталған стратегиялық серіктестікті нығайтуды көздейтінін айтты.
Келіссөздер соңында Тоқаев Германия канцлері Фридрих Мерцті Қазақстанға шақырды.
Тоқаев сондай-ақ Германия президенті Франк-Вальтер Штайнмайермен кездесті.
