Бангладеш билігі соғыс қиратып кеткен Мьянма азаматтарына арналған гуманитарлық дәлізді Мьянманың Ракхайн штатымен шекарада ашу туралы БҰҰ-ның сұранысын қабылдағанын мәлімдеді.
Бангладештің Сыртқы істер жөніндегі кеңесшісі Мухаммед Товхид Хоссейн жексенбі күні ел астанасы Даккада журналистерге: «БҰҰ Мьянманың Ракхайн штатына гуманитарлық көмек жеткізу үшін Бангладеш аумағы арқылы гуманитарлық дәліз құруды сұрады. Уақытша үкімет белгілі бір шарттармен бұл ұсынысты мақұлдады», – деді.
Хоссейн сөзін жалғастырып, «Бұл тек гуманитарлық мақсаттағы дәліз болады. Бірақ біздің өз шарттарымыз бар. Толық мәлімет бере алмаймын. Егер шарттар орындалса, көмек көрсетеміз», – деді.
Хоссейн Мьянмадағы қақтығыстың Бангладештің мүддесімен тікелей байланысты екенін айтты: «Мьянмадан көшкен көп адам бізге босқын ретінде келді және біз оларды елдеріне қайтарғымыз келеді. Оларды кері қайтару үшін қажет барлық қадамды жасауымыз керек», – деді.
Гуманитарлық дағдарыс
Мьянманың әскери билігі Ракхайн штатында әрекет ететін Аракан армиясы атты көтерілісшілер тобын оқшаулау үшін гуманитарлық көмектің барлық түріне тосқауыл қойды. Бұл жағдай өңірдегі гуманитарлық дағдарысты одан әрі ушықтырды.
БҰҰ Ракхайн штатында ашаршылық қаупінің бар екенін айтып, Бангладештен гуманитарлық көмекті жеткізу үшін дәліз ашуды сұрады.
Әдетте мұндай гуманитарлық дәліздер бейбіт тұрғындарға көмек көрсету үшін ашылады, алайда кей жағдайларда ол арқылы бүлікшілер немесе террористік топтар сияқты қылмыстық ұйымдар қауіпсіз өту мүмкіндігін пайдаланып кетуі мүмкін деген алаңдаушылық туындауда. Бұл өңір сондай-ақ есірткі мен заңсыз қару-жарақ контрабандасының белгілі бір бағыты ретінде де танымал.
Осы алаңдаушылықтарға жауап ретінде Хоссейн: «Дәліз тек гуманитарлық жүк үшін қарастырылған, қару тасымалдауға жол берілмейді», – деп мәлімдеді.
Мьянмамен шекара мәселесіне тоқталған Хоссейн: «Бұл аймақта шекараның барлық бөлігі мемлекеттік емес құрылымның (Аракан армиясының) бақылауында. Мьянма орталық үкіметінің (әскери хунта) бұл өңірде ешқандай бақылауы жоқ. Сондықтан өз қауіпсіздігіміз үшін мемлекеттік емес құрылымдармен ресми байланыс орната алмаймыз. Бірақ қалай болғанда да олардан толықтай оқшаулана алмаймыз… Қажет болған жағдайда ғана байланыс орнатамыз», – деп түйіндеді.
