Норвегия астанасы Ослодағы АҚШ елшілігінде жексенбі күні таңсәріде жарылыс болды. Осло полициясы оқиғадан ешкімнің зардап шекпегенін және жарылыстың себебі әзірге белгісіз екенін хабарлады.

Полицияның мәліметінше, жарылыс жергілікті уақыт бойынша шамамен сағат 01:00-де болған және ғимараттың кіреберісінде «аз мөлшерде материалдық шығынға» себеп болған.

Мәлімдемеде оқиға орнында тексеру жүргізген топтардың иттер, ұшқышсыз ұшу аппараттары және тікұшақтардың көмегімен «бір немесе бірнеше ықтимал күдіктінің» ізіне түскені айтылды.

Полиция қызметкері Михаэль Деллемюр “TV2” арнасына берген сұхбатында тергеу әлі бастапқы кезеңде болғандықтан «зақымның сипаты, ненің жарылғаны және ұқсас тағы басқа жайттар туралы» пікір білдірмейтінін айтты.

Кейінірек Деллемюр “TV2” -ге берген тағы бір мәлімдемесінде «Біздің ойымызша, бұл біреудің қасақана жасаған әрекетіне ұқсайды» деді.

Полиция оқиғаға байланысты елшілікпен байланыста екенін және жарылыстан бірнеше сағат өткен соң ғимарат маңындағы аумақ «қауіпсіз» деп танылғанын мәлімдеді.

Үш жарылыс дыбысы

АҚШ-тың Иранға қарсы әскери шабуылдарына байланысты Таяу Шығыстағы АҚШ елшіліктері жоғары дайындық деңгейіне көшірілген еді.

Алайда Деллемюр Ослодағы елшілікте болған оқиғаның бұл қақтығыспен байланысты екеніне әзірге ешқандай белгі жоқ екенін айтты.

«Біз мұны қақтығыспен байланыстырмаймыз. Бұлай деуге әлі тым ерте», — деді ол.

Елшілік маңында тұратын кейбір адамдар да жарылыс дыбысын естігенін хабарлаған.