Армения үкіметі елге кіру және шығу кезінде паспорттарға қойылатын мөрден Ағры тауының бейнесін алып тастау туралы шешім қабылдады.

Жергілікті БАҚ-тың хабарлауынша, 2025 жылдың 1 қарашасынан бастап Ағры тауының бейнесі бар мөр қолданылмайды.

Ағры тауы Түркия аумағында, Армения шекарасына жақын орналасқан.

“X” әлеуметтік желісінде жарияланған жазбада Армения Еңбек және әлеуметтік істер министрі Арсен Торосян жаңартылған мөрде тек шекарадан өту туралы мәліметтер ғана болатынын, қосымша суреттер болмайтынын айтты. Бұл көптеген ел ұстанатын тәжірибеге сәйкес келеді.

Армения билігі шекаралық мөрлерден Ағры тауының бейнесін алып тастау арқылы көрші елдерге қауіпті хабарламалар жібермеуді көздегенін мәлімдеді.

Бұрыннан келе жатқан дау

2023 жылы Франция бір француз шенеунігінің Ағры тауының суретімен жариялаған жазбасын қорғаған болатын. Ал бұл болса ультраұлтшыл армяндардың аумақтық амбицияларын қолдағандай көрінді.

Сол кезде Парижде Сыртқы істер министрлігінің баспасөз мәслихатында Франция Ағры тауы Арменияға тиесілі деп санай ма?, француз шенеуніктері бұл мәселе бойынша «қате ақпарат алған ба?» немесе мұндай жазба түрік халқын ренжітетінін білмеді ме? деген сұрақ қойылған еді.

«Ағры тауы Армения жағынан қарағанда символдық көрініс болып табылады, өйткені ол шекараға жақын орналасқан», – деп жауап берді баспасөз хатшысы Анна-Клэр Лежандр.

Түркияның сыны

Түркияның Армениямен диалог жөніндегі арнайы өкілі Сердар Кылыч таудың Түркия шекарасының ішінде екенін атап өтті.

«Құрметті министр, суреттегі тау – Түркия шекарасында орналасқан Ағры тауы, сондықтан ол Түркияның ажырамас бөлігі болып табылады», – деген еді Кылыч.