Түркия Республикасының президенті Режеп Тайып Ердоған өршіп бара жатқан аймақтық қақтығыстардан Түркияны алшақ ұстау үкіметтің ең маңызды басымдығы екенін айтты және елді соғысқа итермелеуді көздейтін арандатушылықтардан сақтандырды.
Ердоған жұма күні жасаған мәлімдемесінде «Елімізді осы “от шеңбердің” тысында ұстау — біздің ең үлкен басымдығымыз», — деді. Анкараның Түркияны соғысқа тартуға бағытталған жоспарлар, тұзақтар мен арандатушылықтар алдында аса сақтықпен әрекет етіп жатқанын баса айтты.
Бұл мәлімдеме Иранға бағытталған шабуылдар мен Иранның қарымта соққыларынан кейін аймақтық шиеленіс шегіне жеткен тұста жасалды. НАТО Ираннан Түркияға қарай атылған үшінші зымыранды да атып түсірді. Президент Ердоған Түркияның өз аумағын нысанаға алған қатерлерге қарсы қажетті қадамдар басқанын және әуе кеңістігін қорғауды жалғастыратынын айтты.
Ол Түркияның әуе кеңістігін бұзатын барлық қатерге қарсы тиісті шаралар қабылданғанын, кеше түндегідей шұғыл әрекет етілетінін білдірді.
Мәзһабтық шиеленіс туралы ескерту
Ердоған жалғасып жатқан дағдарыс кезінде мәзһабтық және этникалық араздықты қоздыруға бағытталған әрекеттерге қарсы азаматтарды қырағы болуға шақырды. Мұндай шиеленістер Иранға жасалған шабуылдар мен аймақтағы жалпы тұрақсыздық жағдайында әдейі ұйымдастырылуы мүмкін екенін айтты.
«Азаматтарымыз мәзһабтық және этникалық шиеленісті қоздыруға бағытталған талпыныстар алдында абай болуы керек», — деді ол. Президент өзгерген геосаяси орта Түркияның бұдан да жылдам әрі стратегиялық тұрғыдан әрекет етуін талап ететінін де атап өтті.
Адамзаттың ар-ожданы
Ердоған сонымен қатар халықаралық қауымдастықтың әсіресе Газа мәселесіндегі екіжүзді реакцияларын сынға алды. Кейбір елдердің зұлымдық пен геноцидке көз жұмып отырғанын, ал кейбірінің зорлық-зомбылыққа жауапты тараптарды ашық қолдайтынын айтты.
«Виртуалды әлемнің жасанды ар-ожданының кесірінен жетім қалған палестиналық және сириялық балалардың қайғысы тіпті бір пингвин көрген құрмет пен қызығушылыққа ие болмады», — деді ол. Президент Ердоған ар-ождан дағдарысы болып жатқан әлемде Түркияның адамзаттың ар-ожданы болуы үшін күресетінін де сөзіне қосты.
