Үндістан Пәкістандағы үш әуе базасына зымыранмен шабуыл жасағаннан кейін Пәкістан «Бунян-ун-Марсус» деп аталатын жауап операцияларын бастады.

Пәкістанның мемлекеттік ақпарат құралдары сенбі күні таңертең «Бунян-ун-Марсус операциясы басталды» деп хабарлады.

«Үндістанның бірнеше аймағы жауап шабуылдары үшін нысанаға алынуда. «Бунян-ун-Марсус» сөз тіркесі «төзімді құрылым» немесе «тосқауыл қабырға» деген мағынаны білдіреді», - делінген хабарламада.

Пәкістан армиясы көздеген нысаналардың Үндістанның Брахмос зымырандар қоймасы мен Кашмирдің Үндістан басқаратын бөлігінің Патханкот және Удхампур аудандарындағы әуе базалары екенін айтты.

«Reuters» ақпарат агенттігі Үндістан әскери дереккөздеріне сілтеме жасап, қазір Үндістанның Пәкістанға әуе шабуылдарын жасап жатқанын хабарлады.

Кашмирдің Үндістан бақылауындағы аудандарында тұратын тұрғындар көптеген аймақта қатты жарылыс дауыстарын естігенін айтты.

Сенбі күні даулы аймақтың екі ірі қаласы Сринагар мен Джаммуда, сондай-ақ гарнизондық Удхампур аймағында жарылыстар естілген.

Үнді зымырандары

Пәкістан армиясының өкілі Пәкістанның қарсы шабуылдарынан бұрын Үндістанның Пәкістан ішіндегі үш әуе базасына зымыранмен шабуылдағанын, бірақ зымырандардың көпшілігі ұсталғанын мәлімдеді.

Бұл оқиғалар өткен ай Үндістан Пәкістанды айыптаған қарулы шабуылға байланысты туындаған шиеленістің соңғы жағдайын көрсетеді.

Исламабад шабуылға қатысы жоқ екенін айтып, халықаралық тергеу жүргізуге шақырған болатын. Бірақ Үндістан бұл талапты қабылдамады.

Үндістан армиясы жұма күні түнде жасаған мәлімдемесінде Кашмирдің Үндістанның бақылауындағы 26 аймағында, соның ішінде Пәкістанмен шекаралас Үндістан штатындағы Сринагар қаласында ұшқышсыз ұшақтар байқалғанын хабарлады. Ал Үндістан мәлімдемесінде ұшқышсыз ұшақтарды бақылап, тойтарыс бергенін айтты.

«Жағдай мұқият және үздіксіз қадағалануда. Қажет болған жерде жылдам шаралар қабылдануда», - деп білдірді Үндістан армиясы.