Түркия президенті Режеп Тайып Ердоған Түркияның қорғаныс өнеркәсібіндегі маңызды кезеңді атап өтіп, Түркияда өндірілген 48 «KAAN» жойғыш ұшағының Индонезияға экспортталатынын мәлімдеді.

Сәрсенбі күні «X» платформасында жариялаған мәлімдемеде Ердоған бұл өте маңызды және қуантатын жетістік» деп сипаттап, ұшақтардың келісім бойынша Түркияда шығарылатынын атап өтті. Сонымен қатар келісім индонезиялық мамандарды өндіріс процесіне тартуды қамтиды.

«Ұлттық қорғаныс өнеркәсібіміздің дамуы мен қазіргі мүмкіндіктерін көрсететін бұл келісім Түркия үшін де, Индонезия үшін де пайдалы болады деп үміттенемін», - деді Ердоған.

«Рекордтық экспорт келісімі»

Ердоған келісімнің жүзеге асуында маңызды рөл атқарған Индонезия президенті Прабово Субиантоға ризашылығын білдірді.

Президент Түркия тарихындағы «рекордтық экспорт келісімін» жүзеге асырғаны үшін Қорғаныс өнеркәсібі мен Түрік аэроғарыш өнеркәсібін және осы процеске қатысқан барлық мекемелерді құттықтады.

Үкіметтің осы секторға қолдау көрсетуді жалғастыратынын атап өткен Ердоған «Қорғаныс өнеркәсібіміздің бұдан да күшейе түсуі үшін барлық компанияларымызға табандылықпен қолдау көрсетуді жалғастырамыз. Осы салада жұмыс істейтін барлық бауырыма шын жүректен алғыс айтамын», - деді.

Бесінші буынға жататын «KAAN» жойғыш ұшағы радардан қашатын мүмкіндіктерге ие және әрқайсысы 13 000 килограмм күш беретін қос қозғалтқышпен жұмыс істейді. Осы мүмкіндіктердің арқасында ұшақ 1,8 Mach жылдамдығына жете алады.

Сонымен қатар Түрік аэроғарыш өнеркәсібі жасанды интеллект, жетілдірілген сенсорлық жүйелер мен ұшқышсыз ұшу аппараттарымен жұмыс істеу қабілетін біріктіретін алтыншы буын моделін жасауда.