Президент Режеп Тайып Ердоған бейсенбі күні Иран президенті Месуд Пезешкианмен телефон арқылы сөйлесті. Ол Түркияның Иранға бағытталған кез келген шетелдік операцияға қарсы екенін және көршілерінің бейбітшілігі мен тұрақтылығына мән беретінін мәлімдеді. Бұл туралы Президенттік аппарат “X” әлеуметтік желісінде хабарлады.
Президент аппаратының мәлімдемесіне қарағанда, телефон әңгімесінде Ирандағы соңғы оқиғалар талқыланған. Ердоған мәселелердің жаңа шиеленіске жол бермей шешілуі Түркияның да мүддесіне сай келетінін жеткізген.
Иран соңғы жылдардағы үкіметке қарсы ең ірі наразылықтармен шайқалып жатыр. Шерулерге қарсы жүргізілген ауқымды қауіпсіздік операцияларынан кейін елдің діни лидері Әли Хаменеи сенбі күні жасаған мәлімдемесінде оқиғаларда «бірнеше мың» адамның қаза тапқанын айтты. Бұл мәлімдеме ирандық ресми өкіл тарапынан шығын көлеміне қатысты жасалған алғашқы ашық растау болды. Хаменеи адам өлімдеріне байланысты Америка Құрама Штаттарын айыптады.
Алғашында экономикалық қиындықтарға байланысты басталған наразылықтар мен ереуілдер 1979 жылғы революциядан бері елді басқарып келе жатқан діни билікке қарсы бұқаралық қозғалысқа ұласты. 8 қаңтардан бастап бірнеше күнге созылған шерулерге жүз мыңдаған адам қатысты.
Сәрсенбі күні Иран Сыртқы істер министрі Вашингтонға қатысты осы уақытқа дейінгі ең қатал ескертуін жасап, Ислам Республикасы «қайтадан шабуылға ұшыраған жағдайда, барлық мүмкіндіктерімен жауап беретінін» мәлімдеді.
Билік өкілдерінен алғашқы ресми мәлімет те сол күні жарияланды. Мемлекеттік телеарнаның хабарлауынша, Иранның ардагерлер мен шейіттер қоры наразылықтар кезінде жалпы саны 3 117 адамның қаза тапқанын хабарлады.
