Түркияның ұйымдастыруымен өтетін 36-шы НАТО Мемлекет және үкімет басшылары саммитінің дайындық жұмыстары аяқталды.
Саммит аясында НАТО-ға мүше 32 елдің мемлекет және үкімет басшылары, мыңдаған дипломат, журналистер мен қонақтар қабылданады. Бағдарламалардың бір бөлігі «ATO Congresium» конгресс орталығында өтеді.
НАТО мемлекет және үкімет басшылары 8 шілде күні Президенттік кешенде бас қосады.
Қорғаныс өнеркәсібі форумы алғаш рет Түркияда ресми бағдарлама аясында өткізілуде
Президенттік кешенде бүгін НАТО-ның қорғаныс және сыртқы істер министрлерінің қатысуымен іс-шаралар ұйымдастырылады.
Соңғы 3-4 жылда НАТО-ның қосымша іс-шарасы ретінде жоспарланып келген Қорғаныс өнеркәсібі форумы алғаш рет Түркияда саммиттің ресми бағдарламасына еніп отыр.
НАТО жариялаған бағдарламаға сәйкес, маңызды мәлімдеме жасалатын Форумда Президенттің орынбасары Джевдет Йылмаз, Ұлттық қорғаныс министрі Яшар Гүлер және НАТО Бас хатшысы Марк Рюттенің сөз сөйлеуі жоспарланған.
Қорғаныс өнеркәсібіне қатысты түрлі отырыстар ұйымдастырылатын Форум аясында Рютте мен Украина президенті Владимир Зеленский де мәлімдеме жасайды.
НАТО Бас хатшысы Рютте қорғаныс өнеркәсібі өндірісін арттыру мәселесі Форумның ең маңызды тақырыптарының бірі болатынын атап өткен еді.
Анкара әлем көшбасшыларын қабылдауда
Президент Режеп Тайып Ердоған 36-шы НАТО Мемлекет және үкімет басшыларының саммиті аясында АҚШ президенті Дональд Трамп, Франция президенті Эммануэль Mакрон, Финляндия президенті Александр Стубб, Словакия президенті Петер Пеллегрини, Ұлыбритания премьер-министрі Кир Стармер, Германия канцлері Фридрих Мерц, Италия премьер-министрі Джорджа Мелони, Канада премьер-министрі Марк Карни, Албания премьер-министрі Эди Рама, Болгария Премьер-министрі Румен Радев, Черногория премьер-министрі Милойко Спаич және НАТО Бас хатшысы Рюттемен қатар Еуропалық кеңес төрағасы Антониу Кошта сияқты жетекшілермен екіжақты кездесулер өткізеді.
Саммит шеңберінде сыртқы істер министрлері мен қорғаныс министрлері де жұмыс түскі асында бас қосады.
2004 жылы Стамбулдағы НАТО саммитінде негізі қаланған және құрамында Катар, Бахрейн, Кувейт пен Біріккен Араб Әмірліктері бар «Стамбул ынтымақтастық бастамасы» аясында сыртқы істер министрлері деңгейінде арнайы отырыс ұйымдастырылып, НАТО-Стамбул ынтымақтастық бастамасы Сыртқы істер министрлерінің кездесуі өтеді.
Саммитте трансатлантикалық қарым-қатынастарда соңғы уақытта артқан шиеленістерге қарамастан, одақтастардың бірлік пен ынтымақтастық туралы мәлімдеме жасауы басты үміттердің бірі болып табылады.
Негізгі күн тәртібінде Еуропаның конвенциялық (дәстүрлі) қорғаныста көшбасшылықты қолға алуын және АҚШ-тың Еуропадағы әскери болмысын қайта қарауды көздейтін «НАТО 3.0» тұжырымдамасын қалыптастыру мәселесі тұр.
Украинаны қолдаудың болашағы да талқыланатын саммитте одақтастардың қорғаныс шығындары мен қорғаныс өнеркәсібінің өндірістік әлеуетін арттыру бойынша міндеттемелер алуы күтілуде.
НАТО Анкара саммиті халықаралық баспасөз өкілдері ең көп қатысатын НАТО саммиті ретінде тарихқа енбек.
