Трамп әкімшілігі АҚШ Иммиграция және кеден қызметі бөлімшелерінің иммиграциялық операцияларына қолдау көрсету мақсатында Флорида штатына шамамен 200 теңіз жаяу әскерін жіберуде. Бұл туралы АҚШ Солтүстік қолбасшылығы бейсенбі күні жасаған мәлімдемесінде хабарлады.
"Солтүстік Каролинадағы “Marine Corps Air Station New River”-ден “Marine Wing Support Squadron 272” құрамындағы шамамен 200 теңіз жаяу әскері АҚШ Иммиграция және кеден қызметінің ішкі иммиграцияны орындау миссиясына қолдау көрсету үшін Флоридаға жөнелтілді. Бұл қолдау АҚШ Иммиграция және кеден қызметі белгілеген орындарда маңызды әкімшілік және логистикалық қызметті қамтамасыз ету мақсатында жүзеге асырылады," делінген мәлімдемеде.
Мәлімдемеде қолдау көрсетілетін басқа штаттар қатарында Луизиана мен Техас та бар екені айтылды. Сонымен қатар теңіз жаяу әскерлерінің міндеттері тек әкімшілік және логистикалық қызметпен шектелетіні және АҚШ Иммиграция және кеден қызметі бақылауындағы адамдармен тікелей байланыс орнатуына тыйым салынғаны атап өтілді.
Лос-Анджелестегі дүрбелең
Бұл мәлімдеме Калифорнияның Лос-Анджелес қаласында АҚШ Иммиграция және кеден қызметі агенттері мен наразылық білдірушілер арасындағы қақтығыстардан бірнеше апта өткен соң жарияланды. Қақтығыстар иммиграциялық операциялар аясында болып, зорлық-зомбылыққа ұласты.
Алғашқы қақтығыстардан кейін Трамп АҚШ-тың екінші ірі қаласы Лос-Анджелеске Ұлттық гвардия мен теңіз жаяу әскерін орналастырылатынын айтты. Бұл күштер бейбіт тұрғындарды тұтқындап, қалада үлкен дүрбелеңге себеп болды.
Калифорния штатының губернаторы Гэвин Ньюсом мен Лос-Анджелес мэрі Карен Басс қалада әскери күштің қолданылуына қарсы шығып, президентті "Лос-Анджелесті заңсыз милитаризациялады" деп айыптады.
Кейін Трамп АҚШ Иммиграция және кеден қызметіне Демократтар басқаратын қалаларда иммиграциялық операцияларды кеңейту туралы бұйрық берді. Бұл шешім Лос-Анджелестегі тәртіпсіздіктің басқа қалаларда да қайталану қаупі бар екенін білдірді.
