Ресей Украина шығысындағы Сумы облысында орналасқан Басивка ауылын бақылауына алғанын және өңірдегі бірнеше елді мекенде украин күштеріне соққы жасағанын хабарлады.
Ресей мен Украина арасындағы соғыс басталғанына екі жылдан асқанда Киев 2023 жылғы тамызда мыңдаған сарбазын Ресейдің Курск аймағына шекара асыра жіберген болатын. Алайда соңғы айларда Ресейдің жасаған шабуылдары Украина күштерін Курсктен шегінуге мәжбүр етті.
Ресей президенті Владимир Путин шекара бойында қауіпсіздік мақсатында «аралық аймақ» құру қажеттігін бірнеше рет мәлімдеген.
Ресей Қорғаныс министрлігінің хабарлауынша Суджа шекара өткелінің жанындағы Басивка ауылы Ресей күштерінің бақылауына өткен. Сондай-ақ Сумы облысындағы 12 нүктеде украин күштеріне соққы жасалғаны айтылды.
Бұдан бөлек Ресей күштері өз аумағындағы Горналь, Гуево және Олешня елді мекендерінде шоғырланған украин бөлімшелерін де тойтарғанын мәлімдеді.
Бақылау кімнің қолында?
“DeepState” картасына сәйкес қазіргі таңда Украина Ресей аумағындағы шамамен 63 шаршы шақырым жерді бақылауда ұстап отыр. Бұл көрсеткіш Киев өткен жылы мәлімдеген 1 400 шаршы шақырыммен салыстырғанда айтарлықтай азайған.
Шекара маңындағы, оның ішінде Басивка ауылы да бар 81 шаршы шақырымдай аумақ «бақылау жағдайы белгісіз» деп қарастырылуда.
Ресей қазіргі кезде Украинаның шамамен бестен бір бөлігін бақылауда ұстап отыр. Бұл аумаққа 2014 жылы аннексияланған Қырым түбегі толықтай, Луганск облысының барлығына дерлігі, Донецк, Запорожье және Херсон облыстарының 70%-дан астамы кіреді.
Сонымен қатар Харьков облысының шағын бір бөлігі де Ресейдің бақылауында.
