Брюссельде өткен НАТО Сыртқы істер министрлері кездесуіне қатысқан Түркия Сыртқы істер министрі Хакан Фидан Ресей мен Украина арасындағы ықтимал бейбіт келіссөздер үшін Түркиядан қолайлы орын жоқ екенін айтты.

Фидан сәрсенбі күні “TRT Haber” арнасына берген сұхбатында: «Біз мұны өткен жазда Стамбулда үш рет өткізген кездесулерімізбен дәлелдедік. Келіссөздерді біз ұйымдастырып, отырыстарды жүргіздік. Тараптар әр кездесуден шынымен разы болып шықты»,- деді.

ЕО және НАТО әріптестерімен өткізген кездесулерден кейін Фидан талқылаулардың негізінен Ресей–Украина соғысына, ықтимал бейбіт келісімге және Түркия делдалдық рөл атқаратын өңірлік мәселелерге бағытталғанын айтты.

Ресей–Украина бейбіт үдерісіне қатысты Фидан: «Ең маңыздысы — келіссөз үстелінен кетпеу. Ынтымаққа ниеттеніп отырсаңыз, түбінде нәтижеге қол жеткізіледі», -деді.

Оң көзқарас

Фидан екі тараптың да жақын оң ұстаным көрсетуі мүмкін деген үміт бар екенін қосты.

Фидан кез келген қорытынды келісім тек соғысты тоқтатумен шектелмей, Еуропаның болашағын да қалыптастыратынын баса айтып, «Барлығы тәуекел мен пайданы есептеп отыр. Мұндай күрделі жағдайда мақсаттарды айқындау және тараптарды сол мақсаттарға шоғырландыру барған сайын маңызды болып келеді», -деді.

Қаратеңіздегі шабуылдар

Сыртқы істер министрі Фидан Қаратеңіз жағалауына жақын орналасқан коммерциялық кемелерге жасалған соңғы шабуылдарға да тоқталды.

Оның айтуынша, Түркия, Румыния және Болгария теңізде қалқып жүрген миналарға қарсы күресу және теңіз қауіпсіздігін арттыру үшін жұмыс тобын құрған, ал теңіз күштері қазірдің өзінде ынтымақтасып жұмыс істеп жатыр.

Фидан: «Соңғы шабуылдар біздің ескертулеріміздің қаншалықты орынды болғанын көрсетеді. Соғыс географиясы кеңейіп барады, бұл — өте қауіпті», - деді.