АҚШ Ішкі қауіпсіздік министрі Кристи Ноэм президент Дональд Трамп қаңтар айында қызметіне кіріскелі бері ел бойынша 480 мыңнан астам құжаты жоқ мигранттың тұтқындалғанын мәлімдеді.
Дүйсенбі күні Флоридада өткен баспасөз мәслихатында Ноэм: «Қаңтар айынан бері Ішкі қауіпсіздік министрлігі 480 мыңнан астам заңсыз мигрант қылмыскерді ұстады. Бұл адамдардың 70 пайызына айып тағылған немесе осы айыптар бойынша сотталған», - деді.
Кристи Ноэм сөзін жалғастырып, «Біз ел бойынша қауымдастықтарды қауіпсіз етіп, отбасылардың өркендеуіне, жақсы өмір сүруіне және осы елдің негізін қалаған еркіндіктің игілігін көруіне мүмкіндік беріп отырмыз», - деді.
Өткен айда министрлік 20 қаңтардан бері 2 миллион заңсыз мигранттың АҚШ-тан кеткенін хабарлаған болатын. Мәлімдемеге сәйкес, олардың шамамен 1,6 миллионы елден өз еркімен кетсе, 400 мыңы ресми депортацияланған.
«Рекорд»
Бұдан бөлек президент Дональд Трамп дүйсенбі күні жасаған мәлімдемесінде әкімшілік жүргізіп отырған «рекордтық деңгейдегі» құқық қорғау қызметін жоғары бағалап, ФБР-дың зорлық-зомбылық қылмыстары, есірткі операциялары және балаларды қорғау бағытындағы жаңа деректерін мысал келтірді.
“Truth Social” желісіндегі парақшасында Трамп: «Менің әкімшілігім тұсында ФБР керемет жұмыс істеп жатыр. 20 қаңтардан бері 28 мыңнан астам зорлық-зомбылық қылмысына қатысы бар адам тұтқындалды (рекорд!), 6 мыңнан астам заңсыз қару тәркіленді, 1 700-ден астам бала зорлықшылары мен 300 адам саудагері көшеден аластатылды», - деп жазды.
Сондай-ақ ол 5 000 баланың құтқарылғанын және агенттердің 1 900 килограмм фентанил тәркілегенін айтып, бұл «125 миллион адамды өлтіруге жететін мөлшер» екенін атап өтті.
Президент Трамп мәлімдемесін «Біз Америкаға ЗАҢ МЕН ТӘРТІПТІ қайта орнатып жатырмыз. Кэш, Дэн, Эндрю және ФБР-дағы әйелдер мен ерлердің бәрі тамаша жұмыс атқаруда — БІЗ АМЕРИКАНЫ ҚАЙТАДАН ҚАУІПСІЗ ЕТІП ЖАТЫРМЫЗ!» сөздерімен қорытындылады.
