Ресей бейсенбі күні Украинамен бейбіт келіссөздер үшін алаң ұсынған Түркияға алғыс білдірді. Ресей Сыртқы істер министрлігінің ресми өкілі Мария Захарова кез келген келіссөз форматы саяси, дипломатиялық немесе гуманитарлық мәселелер бойынша нақты нәтижелер беретін болса, маңыздылығы арта түсетінін айтты.

Захарова: «Біз үшін әрқашан келіссөз үдерісіне алаң ұсынатын елдердің бастамалары, сондай-ақ бұл жұмыстың жүргізілуіне қатысты олардың ұсыныстары, модельдері мен тұжырымдамалары маңызды»,- деді.

Түркия келіссөздерге алаң ұсыну туралы ұсынысын бірнеше рет қайталады және төртінші жылына енген соғыс кезеңінде бұған шын мәнінде жағдай жасаған санаулы елдердің бірі.

Захарова Украина тарапынан теріс көзқарас болғанына қарамастан, Мәскеудің әрдайым адамдар үшін гуманитарлық мәселелерді шешу және бейбітшілікке қарай жылжу мақсатында байланыс орнатып келгенін атап өтті.

«Стамбул келіссөздерінің Киев режимі тарапынан кедергіге ұшырағанын көріп отырмыз. Соңғы кезеңдегі барлық ұсыныстарымыздың Украина тарапынан орындалмағанын білесіздер. Ниеттерін қайта мәлімдегеннен кейін керісінше әрекет етті. Нақтырақ айтар болсақ, мүлдем ештеңе істемеді»,- деді ресми өкіл.

Захарова сөзін жалғастырып, «Біз әрқашан ризашылығымызды білдіреміз. Бұл жағдайда Ресей-Украина келіссөздері үшін алаң ұсынудағы қонақжайлылығы мен дайындығы үшін түрік тарапына алғыс айтамыз. Біз бұл форматтан бас тартқан жоқпыз. Бас тартқан Киев режимі»,- деді.

Захарованың айтуынша, шілде айынан бастап Украина Ресейдің ұсыныстарына жауап бермей, келіссөздерді тоқтатқан. Бұл ұсыныстардың қатарында саяси, әскери және гуманитарлық мәселелер бойынша үш жұмыс тобын құру да болған. Өкіл «Украина делегация деңгейін көтеру туралы ұсынысқа да жауап берген жоқ», - деп қосты.