Иерусалим әкімшілігінің мәлімдемесінде радикал израильдіктердің Израиль полициясының қорғауымен Әл-Ақса мешітіне басып кіргені айтылды.

Израиль полициясы радикал топтардың бір мезетте 150 адамға дейін кіруіне рұқсат бергеннен кейін Әл-Ақсаға басып кірген израильдіктер саны 1300-ден асқаны хабарланды. Cондай-ақ олардың мешітке келуі әлі де жалғасып жатқаны атап өтілді.

Израиль полициясы Әл-Ақса мешітінің қақпалары мен Ескі қала маңындағы қауіпсіздік шараларын күшейтіп, мұсылмандардың құлшылық ету үшін мешітке кіруіне кедергі келтірген.

Мәлімдемеде таң намазы кезінде мешітке өте аз мұсылманның кіре алғаны, сондай-ақ Израиль полициясының мұсылмандарды соққыға жыққаны айтылды.

Әл-Ақса мешітінің ауласында Израиль күштері көптеп орналастырылғаны хабарланды.

Сондай-ақ радикал израильдіктердің мешіт ауласында діни рәсімдер өткізгені, бес мың адам жинау мақсатымен Әл-Ақсаға жаппай басып кіруге шақырғаны мәлімделді.

Басып кіруге премьер-министр Беньямин Нетаньяхудың «Ликуд» партиясынан депутат Амит Халеви де қатысқан.

Палестина жерлерін заңсыз иемденген израильдік топтар еврейлердің Тиша бе-Ав діни күніне байланысты Әл-Ақса мешітіне жаппай басып кіруге шақырған еді.