Түркияның Сыртқы істер министрлігі Сирияның оңтүстігіндегі Сувейда уәлаятындағы дағдарысты шешу үшін Сирия, Иордания және АҚШ арасында келісілген жол картасын құптады.

Министрлік сәрсенбі күні жариялаған мәлімдемесінде: «Сирияның оңтүстігіндегі Сувейда уәлаятында тыныштықтың сақталуы, тұрақтылықтың орнауы және қақтығыстардың қайталанбауы үшін жарияланған жол картасын құптаймыз», – деп атап өтті.

Cондай-ақ мәлімдемеде Түркияның жер тұтастығы, бірлігі мен егемендігіне құрмет қағидалары аясында Сириядағы барлық қауымдастықтардың бейбітшілік, қауіпсіздік және тұрақтылық ішінде өмір сүруіне бағытталған күш-жігерді қолдауды жалғастыратыны айтылды.

Сирия Сыртқы істер министрі Асад әл-Шайбани сейсенбі күні Дамаскіде Иордания Сыртқы істер министрі Эймен Сафади және АҚШ-тың Сирия жөніндегі арнайы өкілі Том Барракпен келіссөз өткізіп, жеті тармақтан тұратын жол картасын жариялады.

Әл-Шайбани баспасөз мәслихатында жоспардың Сувейдаға үздіксіз гуманитарлық және медициналық көмек көрсетуді, негізгі қызметтерді қалпына келтіруді, жол қауіпсіздігін қамтамасыз етіп, қозғалысты жеңілдету үшін жергілікті қауіпсіздік күштерін орналастыруды қамтитынын айтты.

Сондай-ақ жәбірленушілерге өтемақы төлеу, қонысынан айырылған адамдардың оралуына рұқсат ету, жоғалғандарды айқындау, уәлаяттағы барлық қауымдастық арасында ымыра үдерісін бастау және «бейбіт тұрғындар мен жеке меншікке жасалған шабуылдарға қатысы бар кез келген адамның жауапқа тартылу мәселелері қарастырылады.

Сейсенбі күні қабылданған бұл қадам Сувейдада бітім орнату және қақтығысқа саяси шешім табуға бағытталған шілде-тамыз айларында Иорданияда өткен келіссөздердің жалғасы болды.

Сувейдада бәдәуилер мен дүрзі топтары арасында бір аптаға созылған қарулы қақтығыстардан кейін 19 шілдеде енгізілген бітім Израильдің әскери шабуылдарының ықпалымен әлі де күн тәртібінде.