Иран медиасының хабарлауынша, АҚШ пен Израильдің әскери шабуылы жалғасып жатқан тұста сейсенбі күні Иранның солтүстігі мен батысындағы әуежайлар мен бірнеше нысан әуеден шабуылға ұшырады.
Тегеран мен Кум қалаларында жарылыс болғаны хабарланды. Сонымен қатар батыстағы Хорремабад әуежайы мен солтүстіктегі Мехрабад әуежайын қоса алғанда маңызды инфрақұрылым нысандарына соққы берілген.
Иранның мемлекеттік “IRIB” телеарнасы астананың кейбір аудандары түні бойы нысанаға алынғанын, ал соққы жасалған аумақтардың қатарында Тегеранпарс пен Саадат-Абадтағы тұрғын аудандар да бар екенін хабарлады.
Хаким тасжолының бойындағы электр станциясы мен Молави ауданындағы сауда дүкендері де зақымданған.
Нысаналар арасында синагога да бар
Жергілікті билік өкілдері Кум маңындағы және Йезд қаласындағы кейбір орындарға да соққы берілгенін, инфрақұрылымға зиян келгенін мәлімдеді.
Мәліметтерге қарағанда, Тегеранның Энгелаб ауданындағы бір синагогаға да соққы берілген.
Әзірге шабуылдардан кейін қаза тапқандар туралы ақпарат түскен жоқ.
