Каспий құбыр консорциумы (КҚК) жексенбі күні жасаған мәлімдемесінде Либерия туымен жүзетін “ASIA” және Маршалл аралдарының туымен тіркелген “NISSOS IOS” мұнай танкерлері Қаратеңіздегі консорциум терминалының маңында тұрған кезде ұшқышсыз ұшу аппараттарының шабуылына ұшырағанын хабарлады.
Консорциумның мәліметінше, шабуылдан кейін мұнай тиеу операциялары тоқтатылды.
КҚК оқиға салдарынан адам шығыны мен мұнайдың теңізге төгілуі тіркелмегенін мәлімдеді. Сонымен қатар “ASIA” танкерінде өрт шыққаны, алайда төтенше жағдай қызметкерлерінің жедел әрекетінің арқасында өрттің сөндірілгені хабарланды.
Консорциум бұл оқиғаны халықаралық құқықпен қорғалатын азаматтық нысанға жасалған бесінші «тікелей шабуыл» деп атап, оны қатаң айыптады.
Мәлімдемеде:
«Каспий құбыр консорциумы Ресей, АҚШ, Қазақстан және Батыс Еуропаның бірнеше елінің жетекші отын-энергетика компанияларын біріктіреді. Компания нысаны мен КҚК теңіз терминалындағы азаматтық кемелерге жасалған шабуыл консорциумға мүше мемлекеттердің мүдделеріне де жасалған шабуыл саналады», – делінген.
Консорциумға санкция салынбаған
Консорциум өз қызметіне ешқашан халықаралық санкциялар қолданылмағанын атап өтті. Бұл оның жаһандық энергетикалық қауіпсіздік пен халықаралық акционерлердің мүдделері үшін маңызды рөл атқаратынын көрсетеді.
КҚК Қазақстандағы Теңіз, Қашаған және Қарашығанақ кен орындарынан өндірілетін шикі мұнайды тасымалдайды.
Консорциумның мәліметінше, 2025 жылы шамамен 70,5 миллион метрлік тонна мұнай жөнелтілген, оның 75 пайыздан астамы шетелдік өндірушілерге тиесілі болған.
Бұған дейін Украина Қарулы күштері Бас штабы Қаратеңізде Ресейдің мұнайы, мұнай өнімдері мен жанармайын тасымалдаған екі танкерге шабуыл жасағанын хабарлаған болатын.
