Полицияның мәлімдеуінше, Пәкістан Талибанына бағынатын содырлар жасырынған жерде бомба жасауға арналған материалдарды сақтаған.  Бұл материалдар дүйсенбі күні елдің солтүстік-батысында жарылып, кемінде 24 адамның өмірін қиды.

Жарылыс Хайбер-Пахтунхва уәлаятындағы Тирах аңғарында болып, айналадағы бірнеше үйді қиратқан. Жергілікті полиция қызметкері Зафар Ханның айтуынша, жарылыстан кемінде 10 бейбіт тұрғын және 14 содыр қаза тапқан. Араларында әйелдер мен балалар да бар.

Ханның мәліметінше, Пәкістандағы Талибан ұйымының екі қолбасшысы  Аман Гул мен Масуд Хан осы жасырын орында болған және осы жерді жол бойына қойылатын бомба жасауға арналған фабрика ретінде пайдаланған. Сондай-ақ полиция содырларды бейбіт тұрғындарды «тірі қалқан» ретінде пайдаланған деп айыптады.

Пәкістан қауіпсіздік күштері Пәкістанның солтүстік-батысындағы Хайбер, Баджаур және басқа да өңірлерінде Талибан лаңкестеріне қарсы операция жүргізуде. Елде Пәкістан Талибандарының террорлық шабуылдары артқан. Пәкістан Талибаны Ауған Талибанымен одақтас болғанымен бөлек ұйым ретінде әрекет етеді. 2021 жылы Ауған Талибаны билікке қайта оралғаннан бері Пәкістан Талибанының күшейгені айтылды. Ұйымның көптеген жетекшісі мен жауынгері Ауғанстанды паналаған деген болжам бар.