Түркия Республикасы Сыртқы істер министрлігінің ресми өкілі Өнджү Кечели Грекияның оқушы санының жеткіліксіздігін сылтау етіп, Батыс Фракиядағы түрік азшылығына қарасты 8 бастауыш мектепті жабу туралы шешімін айыптады.
Өнджү Кечели бұл туралы “X” парақшасында мәлімдеді.
Кечели аталған шешімнің нәтижесінде Батыс Фракиядағы түрік азшылығының бастауыш мектептерінің саны 76-ға дейін азайғанын атап өтіп,
«Грекияның оқушы санының жеткіліксіздігін сылтау етіп, Батыс Фракиядағы түрік азшылығына қарасты 8 бастауыш мектепті жабу туралы шешімін айыптаймыз», – деді.
Сондай-ақ ол Ксанти қаласындағы №1 Түрік азшылығы бастауыш мектебінің бірінші сыныбына оқушыларды қабылдау кезінде жаңа кедергілердің қойылуы Батыс Фракиядағы түрік азшылығының білім алу құқығын шектеуге бағытталған жүйелі әрекеттердің бірі екенін айтты.
Кечели бұл шешімдер мен тәжірибелердің Лозанна бейбітшілік шартының ережелерін бұзу болып табылатынын атап өтіп, былай деді:
«Батыс Фракиядағы түрік азшылығына қатысты құқық бұзушылықтарды анықтаған халықаралық соттардың шешімдерін және Еуропаның негізгі институттарының ұсынымдарын орындаудан жалтарып отырған Грекияны азшылықтардың құқықтары мен негізгі адам құқықтарына қатысты халықаралық шарттардан туындайтын міндеттемелерін орындауға шақырамыз. Түркия Батыс Фракиядағы түрік азшылығының құқықтары мен заңды мүдделерін қорғау жолындағы күресін табанды түрде қолдауды жалғастыра береді.»
