Министрліктің сәрсенбі күні жариялаған мәліметіне сәйкес, Израильдің үш жылдан бері жалғасып келе жатқан соғысы барысында Газа секторы мен басып алынған Батыс Шерияда 20 748 палестиналық оқушы және білім беру саласы мен әкімшілік қызметтің 1 058 өкілі қаза тапқан.
Министрліктің статистикалық есебінде бұл деректер мектептер мен жоғары оқу орындарындағы оқушыларды, студенттерді және қызметкерлерді қамтитыны айтылды. Сондай-ақ мыңдаған адамның жараланып, жүздеген адамның қамауға алынғаны көрсетілді.
Адам шығынымен қатар Газаның білім беру жүйесі де күйреді. Бұған дейінгі деректерге қарағанда, аймақтағы 12 университеттің барлығы зақымданған немесе қираған. Мектептердің басым бөлігі зақымданып, салдарынан жүздеген мың оқушы мен студент тұрақты білім алу мүмкіндігінен айырылған.
БҰҰ сарапшылары білім беру мекемелері мен қызметкерлеріне жүйелі түрде нұқсан келтіруді «схоластицид» яғни білім беру жүйесін жою деп сипаттады.
Бұл ұғым жас ұрпаққа білім беретін мекемелер мен жүйелердің жойылуын білдіреді.
Қирау тек сыныптармен шектелмеген. Кітапханалар, зертханалар, мұрағаттар және басқа да білім беру нысандары зақымданған немесе толығымен қираған.
Газа
Министрлік мәліметіне сәйкес, Газада 19 189 мектеп оқушысы мен 1 386 университет студенті қаза тапқан.
Сонымен қатар 28 586 мектеп оқушысы және 3 082 университет студенті жараланған.
Министрлік мектептерде жұмыс істеген 805 мұғалім және әкімшілік қызметкері мен университеттердің 246 қызметкерінің қаза тапқанын хабарлады.
Бұдан бөлек мектептердің 3 298 қызметкері және университеттердің 1 493 қызметкері жараланған.
Басып алынған Батыс Шерия
Есепке сәйкес, басып алынған Батыс Шерияда 134 мектеп оқушысы мен 39 университет студенті қаза тауып, 871 мектеп оқушысы және 283 университет студенті жараланған.
Израиль күштері сондай-ақ 416 мектеп оқушысы мен 481 университет студентін қамауға алған.
Мектептерде қызмет еткен 7 білім беру және әкімшілік қызметкері қаза тауып, 26-сы жараланған. Сонымен қатар Израиль күштері 176-дан астам мұғалім мен мектеп қызметкерін және 21 университет қызметкерін қамауға алған.
2023 жылдың қазанында Израильдің Газаға қарсы соғысы басталғаннан бері аймақта 74 мыңнан астам палестиналық қаза тауып, 175 мыңнан астамы жараланған. Палестина аумағындағы инфрақұрылымның шамамен 90 пайызы зақымданған немесе қираған.
Осы кезеңде Израиль күштері мен заңсыз қоныстанушылар басып алынған Батыс Шерияда шабуылдарын күшейтіп, 1 210 палестиналықтың қаза табуына, шамамен 13 350 адамның жаралануына себеп болды. Сондай-ақ 24 600-ден астам адам қамауға алды.
