Газа келіссөздеріне араағайын болған Катар қазан айындағы атысты тоқтату келісімінен кейін Израиль мен Хамастың Палестинадағы бейбіт келісімге қатысты келіссөздердің жаңа кезеңіне өтуі мүмкін екенін мәлімдеді.
Катар Сыртқы істер министрлігінің өкілі Мәжид әл-Ансари сейсенбі күні «Тараптарды жақын арада екінші кезеңге өтуге шақыруымыз қажет деп ойлаймыз. Әрине бұл жағдайды қиындататын мәселелерді де қамтиды. Мәселен Сары аймақтың ар жағындағы туннельдердегі жауынгерлер және бірнеше күнде бір рет болатын оқиғалар секілді», - деді.
«Сары аймақ» Израиль әскерлерінің Газа ішінде шегінген нүктесін көрсетеді. Аймақтың ар жағындағы туннельдерде ондаған Хамас жауынгері әлі де қоршауда қалып отыр, ал Израиль олардың нысанға алынатынын айтады.
Катар АҚШ, Түркия және Мысырмен бірге ұзақ уақыт бойы қол жеткізу мүмкін болмаған Газаға қатысты атысты тоқтату келісімін қамтамасыз етті. Бұл келісім 10 қазанда күшіне еніп, Тель-Авивтің Палестинаға қарсы екі жылға созылған геноцид соғысын едәуір бәсеңдетті.
Алғаш рет АҚШ президенті Дональд Трамп жариялаған Газа бейбіт жоспарының бірінші кезеңіне сәйкес, Палестинадағы тойтарыс тобы Хамас пен оның одақтастары 48 тұтқынның барлығын қайтаруы тиіс болатын. Олардың 20-сының әлі тірі екені айтылған.
Келісім бойынша Израиль 48 израильдік тұтқынның орнына 2000 палестиналық тұтқынды, оның ішінде өмір бойы бас бостандығынан айырылған 250 және 2023 жылдың қазан айынан бері қамауда отырған 1700 адамды босату талап етілді.
Көптеген тұтқын оралса да, 10 мыңнан астам палестиналық әлі де Израиль түрмелерінде отыр.
Екі адамның мәйітінен басқасының бәрі Газаға қайтарылды. Ол мәйіттердің Ран Гвили мен Судтисак Ринтхалакқа тиесілі екені айтылды. Алайда Израиль палестиналық тойтарыс тобын мәйіттерді қайтаруды кешеуілдетіп отыр деп айыптады.
Хамас мәйіттердің қайтарылуының баяу болуы екі жылдық соғыстан кейінгі қирандылардан деп түсіндірді. Мәйіттерді тапсыруға қатысты Ансари: «Газадағы логистикалық жағдай бұл нәтижеге қол жеткізуді қиындатуда», - деді.
Сондай-ақ ол мәйіттердің қайтарылуы атысты тоқтатудың екінші кезеңіне өтуге кедергі болмауы тиіс екенін жеткізді.
БҰҰ қолдау білдірген келісімнің екінші кезеңі қараша айында жарияланған еді. Бұл кезеңде Израиль өңірдегі позицияларынан шегінеді, Газаны уақытша басқару органы басқарады, халықаралық тұрақтандыру күші аймаққа орналастырылады.
