Түрік спортшы Зейнеп Сөнмез сәрсенбі күні өзін қолдаған жанкүйерлер алдында Аустралия ашық чемпионатындағы жетістігін жалғастырып, мұндай атмосфераны бұрын-соңды бастан өткермегенін айтты.
Ол мажарстандық Анна Бондарды 6-2, 6-4 есебімен жеңіп, үшінші турда қазақстандық Юлия Путинцевамен жұптасты.
23 жастағы стамбулдық Сөнмез алғашқы матчында 11-нөмірлі Екатерина Александрованы баса озып, Мельбурнда екінші айналымға өткен алғашқы түрік әйел теннисші атанды.
«Жанкүйерлер арасында түріктердің өте көп екенін көргенімде қатты қуандым, өзімді үйдегідей сезіндім», - деді Зейнеп. Ол түрік туын желбіреткен отандастарының өзін ерекше қолдағанын айтып, сөзін былай жалғастырды: «Басында сәл қобалжыдым, кейін үйреніп кеттім. Алаңда өзімді өте жақсы сезіндім. Қолдауды шынымен сезіндім және тіпті бәріміз бірге ойнап жатқандай едік».
Сөнмез былтыр Уимблдонда атын тарихқа енгізіп, «Grand Slam» турнирінде үшінші турға өткен алғашқы түрік теннисші болды.
Ол сол кезде де мықты қолдау көргенін, алайда бұл жолы одан да жақсы болғанын айтты. «Уимблдонда да көп адам болды, мұнда да бірінші турға көп жанкүйер келді. Бірақ бүгін... Мұндайды бұрын-соңды көрген емеспін», - деді.
2024 жылы Мексикада «WTA» чемпиондығын жеңіп алған Сөнмез түрік жанкүйерлердің сол кезде де өте мықты қолдағанын жеткізді. Сондай-ақ Түркиядағы теннис жанкүйерлерінің таңның атысымен теледидар алдында оны қарап отырғанын білудің өзі де оны жігерлендіргенін айтты.
«Олардың қолдайтынын білемін. Мені көріп отырғанын білемін. Сағат шамамен 03:00 еді. Көптеген адамның мені көру үшін ұйқыдан ерте оянғанын білемін», - деді түрік әйел теннисші Зейнеп Сөнмез.
