АҚШ президенті Дональд Трамп Ормуз бұғазында Иранға қарсы АҚШ-тың теңіз қоршауы қайта күшіне енгенін және бұғаз арқылы өтетін барлық жүкке 20 пайыздық транзиттік алым алынатынын мәлімдеді.

Трамп әлеуметтік желідегі жазбасында: «Ормуз бұғазы ашық және Иранға қарамастан ашық қалады», — деді.

Ол тек Иран кемелері мен Иранның атынан әрекет ететін кемелердің бұғазға кіріп-шығуына тосқауыл қойылғанын айтып, бұл шараның «Иран қоршауы» деген атаумен енгізілгенін жеткізді.

Трамп барлық ел Ормуз бұғазын ашық әрі тең жағдайда пайдалана алатынын айтып: «Бұдан былай АҚШ Ормуз бұғазының қорғаушысы», — деді.

Аймақтағы қауіпсіздікті қамтамасыз ету шығындарына тоқталған ол: «Әлемнің аса тұрақсыз аймағында қауіпсіздік пен тұрақтылықты қамтамасыз етуге кететін барлық шығынды өтеу үшін бұғаз арқылы өтетін барлық жүктен 20 пайыздық транзиттік алым алынады», — деді.

Трамп бұл талаптың дереу күшіне енетінін мәлімдеді.

Иранның Сыртқы істер министрі Аббас Аракчи Трамптың Ормуз бұғазынан өтетін барлық жүктен 20 пайыздық алым алу туралы мәлімдемесіне мысқылмен жауап берді.

Аракчи «X» әлеуметтік желісіндегі парақшасында: «АҚШ президентінің бұл мәселе туралы айтқандары орынды. Ормуз бұғазы арқылы сауда кемелерінің қауіпсіз өтуін кім қамтамасыз етсе, сол бұл қызмет үшін ақы алуға тиіс», — деп жазды.

Аракчи: «Ормуз бұғазының қорғаушысы Иран және солай болып қала береді. 20 пайыз тым көп. Біз әділ боламыз», — деді.