Жедел хабар алмасу қолданбасы — Bylock.
Бүкіл Түркия бұл бағдарлама туралы алғаш рет 2016 жылдың 15 шілдесіндегі сәтсіз төңкеріс әрекеті кезінде білді.
Фетуллахшы Террор Ұйымы (ФЕТО/FETÖ) мүшелерінің бұл қолданбаны төңкеріс әрекеті мен өзге де астыртын жоспарлары үшін негізгі шифрланған байланыс желісі ретінде пайдаланғаны анықталды.
Ұйым өзінің барлық құпия іс-әрекеттерін осы хабарлама алмасу бағдарламасы арқылы үйлестіріп отырған. Қауіпсіздік құрылымдарынан алынған мәліметтерге қарағанда, “Bylock” желісі әшкереленгеннен кейін ең қатты назар аударған жайт — қолданба ішінде ФЕТО мүшелеріне берілген ID (сәйкестендіру) нөмірлері болды. Ұйым мүшелерінің бұл бағдарламада өз есімдерімен емес, өздеріне арнайы тағайындалған нөмірлермен тіркелгені белгілі болды. Бірден басталған бұл ID нөмірлері жеке тұлғалардың ұйым ішіндегі маңыздылығы мен лауазымдық дәрежесін көрсеткен. Жүргізілген зерттеу жұмыстарының нәтижесінде жүйедегі жалпы ID санының 215 мыңнан асқаны анықталды.
ФЕТО-ның ең сенімділері алғашқы мыңдықта
Bylock ID нөмірлеріне талдау жасалғанда, бұл қолданбаның алғашқы кезде тек «құпия топтар», ұйымның жоғары лауазымды тұлғалары мен ең маңызды есімдері арасында ғана қолданылғаны байқалды. Ұйым Bylock-ты қатардағы мүшелерінің пайдалануына әлдеқайда кейінірек рұқсат берген.
ID нөмірлерін саралау барысында алғашқы жүздіктің ішінен көрінген тұлғалардың бірі — Ұлттық Барлау қызметіне қарсы астыртын қастандық ісі бойынша сотталған, қазіргі уақытта қамауда отырған бұрынғы полиция бастығы, ФЕТО мүшесі Ерол Демирхан болып шықты. Демирханның ID нөмірі — 27.
Демирханнан кейінгі кезекте 28-ші ID нөмірімен Анкара полициясы бастығының бұрынғы орынбасары, ФЕТО мүшесі Огуз Киремитчи тұр.
Алғашқы жүздіктің ішіндегі тағы бір назар аударарлық есім — Серкан Шахан. ID нөмірі 40-шы болып тіркелген Шахан — армян журналисі Грант Динк қастандығы ісі бойынша айыпталушылардың бірі.
43-ші ID нөмірінің иесі — Дженгиз Өзкан. Өзкан — Ресей елшісі Карловқа жасалған қастандықты ұйымдастырушы Джемал Караатаның тікелей басшысы болған тұлға.
Тағы бір белгілі есім — ФЕТО-ның АҚШ-тағы жауапты жетекшісі (имамы) Мехмет Яша.
49-шы ID нөміріне ие Мехмет Яша — ФЕТО мүшелерінің 30 миллион доллар көлеміндегі қаржысын «Atlanta Star Chain» деп аталатын компания арқылы жымқыру әрекетінің басты кейіпкерлерінің бірі.
Джевхери Гювен де маңызды ID нөмірлерінің қатарында
Bylock ID нөмірлері ұйым ішіндегі «ықпал ету» дәрежесін өте нақты айқындап береді.
ФЕТО ұйымына адалдығымен танылған, қазіргі уақытта қашып жүрген журналист Джевхери Гювен де солардың қатарынан табылды. Гювен алғашқы мыңдықтың ішіне кірмесе де, ұйымға мүше журналистер арасында бірінші орынға жайғасқан.
ФЕТО-ның «Геббельсі» деген лақап атпен де белгілі Гювеннің ID нөмірі — 3320. Bylock-тағы бұл ID нөмірі қашқын журналист Гювеннің ФЕТО құрамындағы өзге журналистермен салыстырғанда ұйым үшін қаншалықты маңызды әрі құнды тұлға болғанын айқын көрсетеді.
