Мария Корина Мачадо өзіне берілген Нобель Бейбітшілік сыйлығын Дональд Трампқа табыстағанын айтты. Алайда Нобель комитеті бұл сыйлықты басқаға беруге болмайтынын мәлімдеді. Яғни сыйлықты сыйлауға болады, бірақ Нобель лауреаты атағы берілмейді.
Венесуэлалық оппозиция жетекшісі Мария Корина Мачадо Ақ Үйдегі кездесуде АҚШ президенті Дональд Трампқа Нобель Бейбітшілік сыйлығын жеке өзі тапсырғанын айтты. Ол журналистерге «Мен Трампқа былай дедім: 200 жыл бұрын генерал Лафайет Симон Боливарға Джордж Вашингтон бейнеленген медаль табыстаған еді. Боливар сол медалді өмір бойы сақтады».
Мачадоның сөзінше, медаль Лафайет тарапынан АҚШ халқы мен Венесуэла халқының зорлық-зомбылыққа қарсы күрестегі бауырластығының нышаны ретінде берілген. «200 жылдан кейін Боливар халқы Джордж Вашингтонның мұрагеріне Нобельдің Бейбітшілік сыйлығын тапсырып отыр», - деді Мачадо.
Трамп 3 қаңтарда Николас Мадуро ұсталғаннан бері Мачадоны Венесуэла халқы қолдамағанын, Мачадоның орнына Мадуроның орынбасары Дельси Родригесті қолдайтынын мәлімдеген болатын. Мадуро билігін тоқтатуға жылдар бойы күш салған Мачадо Трамппен кездескеннен кейін Ақ Үй сыртында өзін қолдаушылармен жүздесті.
Алайда Норвегия Нобель комитеті бұл сыйлықтың басқаға берілмейтінін ескертті. Комитет «X» платформасында «Нобель сыйлығы жарияланғаннан кейін оны кері қайтарып алу, өзге біреуге беру мүмкін емес. Шешім нақты, әрі мәңгілік күшке ие»,- деп мәлемдеді. Яғни медаль физикалық тұрғыда біреудің қолына өтуі мүмкін, бірақ Нобель лауреаты атағы ауыспайды.
