Түркия Республикасының 102 жылдығы елде зор қуанышпен тойланып жатқан тұста президент Ердоған азаматтарды бірлікке шақырып, «Түркия ғасыры» шеңберінде «мықты және өркендеген мемлекет» құру жолындағы ниетін растады.

Сәрсенбі күні жасаған мәлімдемесінде президент ел ішіндегі және шетелдегі барлық азаматтарды, сондай-ақ Кипр түріктерін және «қуанышымызды бөліскен барлық достарды» мерекемен құттықтады.

«Бүгін 86 миллион отандасымызды, Кипр түрік халқын және шетелдегі бауырларымыздың әрқайсысын шын жүректен құттықтаймын», - деді ол. «Бұл жерді қанымен, жанымен қорғаған қаһармандарымызды ризашылықпен еске аламын», -  деп қосты президент.

Ердоған сонымен қатар Мұстафа Кемал Ататүрікке және Тәуелсіздік соғысын басқарған Түркия Ұлы Ұлттық Мәжіліс мүшелеріне де құрмет білдірді.

Президент Түркияның қуатты халық және тамыры терең мемлекет екенін атап өтіп, елдің бірлігі мен егемендігін қорғау жөніндегі табандылығын жеткізді.

Ердоған «Түркия ғасыры» аясында қорғаныс, экономика, энергетика және дипломатия салаларында ауқымды серпіліс жасалып жатқанын айтып, «үлкен, күшті және бақуатты Түркияны» құруды жалғастыратынын хабарлады.

Сондай-ақ ол 2023 жылы ақпан айындағы жер сілкіністерінен зардап шеккен өңірлерді қалпына келтіру жұмыстары аясында үкімет жыл соңына дейін 453 мың жаңа тұрғын үйді  тұрғындарға тапсыруда жоспарлап отырғанын айтты.

Президент Түркияның бейбітшілік пен тұрақтылыққа адалдығын тағы да растап, елдің терроризм қауіпінен азат Түркияға айналу мақсатына нық қадамдармен ілгерілеп келе жатқанын және Газа мен Палестинаны қоса алғанда жаһандық қақтығыстарда әділдік пен адамгершілікті қорғауды жалғастырып отырғанын атап өтті.

Ердоған сөзін «Біз аймақтық көшбасшы, әлемде беделді күшке айналатын үлкен, мықты және өркендеген Түркияны бірге құрамыз», — деп түйіндеп, елін Республика күнімен құттықтады.