Түркия президенті Режеп Тайып Ердоған АҚШ президенті Дональд Трамптың Израиль-Иран қақтығысын тоқтату туралы соңғы мәлімдемелерін құптап, бүкіл аймақты жалынға орауы мүмкін апаттың алдын алу үшін шұғыл шара қабылдау керектігін баса айтты.
Президент аппараты жанындағы Коммуникация басқармасының жексенбі күні «X» платформасында жариялаған мәлімдемесінде екі көшбасшы телефон әңгімесінде Израиль-Иран қақтығысын, екіжақты қарым-қатынастарды және аймақтық мәселелерді талқылағаны хабарланды.
Ердоған Иранның ядролық бағдарламасы мәселесін шешудің жалғыз жолы дипломатия екенін қайталап, бұл бағытта бар күш-жігерін салуға, осы тақырыпта қолайлы жағдай жасауға дайын екендерін айтты. Президент Израильдің Иранға жасаған шабуылдарының екі жаққа да «қайтарылмас экономикалық және адам шығынына» әкелгенін атап өтіп, бұл қауіпті тоқтату керектігін баса айтты.
Трамп жексенбі күні «Truth Social» платформасындағы жазбасында «Иран мен Израиль келісім жасауы керек және олар жасайды» деп бейбітшілікке қол жеткізу үшін көптеген келіссөз бен үндеудің жалғасып жатқанын айтты.
«Шұғыл әрекет»
Жұма күні Израильдің Иранның әскери және ядролық нысандарына шабуылымен басталған қақтығыста Иранның көптеген жоғары дәрежелі қолбасшысы мен ғалымы қаза тапқан болатын. Израиль шабуылдарын жалғастырып, Иран да бұл шабуылдарға жауап берді.
Трамп пен Ердоған сенбі күні телефон арқылы сөйлесті. Түркия президенті Режеп Тайып Ердоған АҚШ президенті Дональд Трамппен телефон әңгімесінде Иран-Израиль қақтығысы Таяу Шығысқа жайылмауы үшін «шұғыл шара» қажет екенін айтты.
