Ердоған сәрсенбі күні Анкарадағы ауызашар кезінде «Израиль үкіметі 10 қазанда біздің де күш-жігерімізбен қол жеткізілген бітімге қарамастан Газа мен Батыс Шерияға қарсы шабуылдарын күшейтуде», - деді.
Ердоғанның айтуынша, Рамазан айын Газада қарсы алып, оқ пен бомба іздері қалған баспаналарда ауыз ашып жатқан палестиналықтар зұлымдыққа мойынсұнбай, мұсылмандар үшін үлгі болуда.
Ол сондай-ақ аймаққа гуманитарлық көмектің жеткізілуінде әлі де елеулі кедергілер бар екенін атап өтті.
Президент: «Өкінішке қарай Газаның тыныс-тіршілігінің күретамыры саналатын Рафах шекара бекетінде Израильдің шектеулері мен қысымы және бейберекет әрекеттері әлі де жалғасуда», - деді.
Палестинамен ынтымақтастық
Ердоған бұл қасиетті күндердің ең алдымен Палестинаның қаһарман ұл-қыздарына, сондай-ақ әлемнің түкпір-түкпірінде ар-намыс, абырой мен бостандығын қорғау үшін күресіп жатқан барлық езілген халықтардың азаттығына және бейбітшілікке жетуіне себепші болуын тіледі. Ол: «Жүрегімізге жақын, әрі ортақ мәдени кеңістігіміздің әр бұрышындағы бауырларымызға сәлем жолдаймын, олар үшін әрқашан дұғада екенімізді жеткізгім келеді», - деді.
Израиль 2023 жылдың 8 қазанында Газаға шабуылын бастады. Салдарынан 72 мыңнан астам адам қаза тауып, 171 мыңнан астам адам жараланды. Олардың басым бөлігі ˗ әйелдер мен балалар.
АҚШ бастамашы болған атысты тоқтату келісімі 10 қазанда күшіне енген болатын. Газадағы денсаулық сақтау мекемелерінің мәліметінше Израиль күштері артиллериялық соққылар мен қарулы шабуылдар арқылы келісімді бірнеше рет бұзып, кемінде 615 адамды өлтірген. 1600-ден астам адамды жаралаған.
