Дүйсенбі күні Ердоған Израиль мен Иран арасындағы шиеленістің артуына байланысты дипломатиялық әрекеттерін күшейтіп, екі ел басшысымен жеке-жеке сөйлесті.
Ердоған Түркияның шиеленісті азайту үшін дайын екенін тағы бір мәрте айтып, кең ауқымды аймақтық соғыстың қаупіне назар аударды және барлық тарапты диалог пен дипломатияға шақырды.
Иран Президенті Масуд Пезешкианмен әңгімесінде Ердоған Израиль мен Иран арасындағы шиеленісті талқылап, Түркияның қақтығысты азайтуға көмектесуге және ядролық келіссөздерге қайта оралу үдерісін қолдауға дайын екенін айтты. Түркия Президентінің аппараты жанындағы Коммуникация басқармасының хабарлауынша, Ердоған аймақта бейбітшілік пен тұрақтылықты сақтау аса маңызды екенін атап өтті.
Путинмен сөйлесті
Ердоған Израиль мен Иран арасындағы қақтығыс және аймақтық мәселелерді талқылау үшін Ресей Президенті Владимир Путинмен де телефон арқылы сөйлесті. Түркия Президенті Израильдің Иранға жасаған шабуылдарының зорлық-зомбылықтың жаңа цикліне түрткі болғанын және бұл жағдай бүкіл аймақтың қауіпсіздігіне қатер төндіріп отырғанын атап өтті. Сондай-ақ ол Израильдің халықаралық құқықты елемеуі жаһандық тәртіпке төнген ашық қауіп деп бағалады.
Ердоған дипломатияның шұғыл қажеттілігін баса айтып, аймақтың жаңа бір соғысты көтере алмайтынын жеткізді. Түркияның белсенді дипломатиялық әрекеттеріне назар аударған Ердоған Иранға қатысты мәселелердің шешімі диалог арқылы ғана мүмкін екенін және барлық тараптың келіссөз үстеліне дереу оралуы тиіс екенін мәлімдеді.
Сонымен қатар Ердоған соңғы шабуылдардың Газа аймағындағы гуманитарлық дағдарысқа деген назарды бұрып жіберу қаупіне тоқталып, Израильдің алаңда қайтымсыз жағдайлар туғызуға ұмтылуы мүмкін екенін ескертті.
Президент Путин Ердоғанның алаңдаушылығымен келісетінін білдіріп, дереу атысты тоқтату қажет екенін және дипломатиялық шешімдерге жол ашу керектігін атап өтті.
Аймақтағы ұшыққан жағдай
Аймақтағы шиеленіс Израильдің жұма күні Ирандағы әскери және ядролық нысандарды қоса алғанда бірнеше нысанаға үйлестірілген әуе шабуылдарын жасағаннан кейін күшейе түсті. Бұл шабуылдарға жауап ретінде Тегеран да қарымта шабуылдар бастады.
Израиль билігінің хабарлауынша, жұма күнінен бері Иранның зымыран шабуылдары салдарынан кемінде 24 адам қаза тауып, жүздеген адам жараланған. Ал Иран тарапы Израильдің шабуылдарынан кемінде 224 адамның қаза тапқанын, 1000-нан астам адамның жараланғанын хабарлады.
