Атом энергиясы жөніндегі халықаралық агенттік басшысы Рафаэль Гросси сұқбатында ирандықтардың оған Израильдің Иранның ядролық нысандарына шабуылы Иранның ядролық қару жасаудағы жігерін арттыруы мүмкін екенін ескерткенін айтты.

Гросси дүйсенбі күні «Jerusalem Post» веб-сайтында және «i24» телеарнасында жарияланған сұқбатында «Шабуыл Иранның ядролық қару жасауға немесе Ядролық қаруды таратпау туралы келісімнен шығуға деген ынтасын күшейтуге әсер етеді деп ашық айта аламын», - деді. Бірақ Гросси Израильдің Тегеранның ядролық нысандарына шабуыл жасайтынына күмәнмен қарайтынын айтты.

Гросси «Jerusalem Post» газетіне берген сұқбатында Иранның ядролық бағдарламасының «ауқымды және терең» екенін айтып, «Оны бұзу үшін жойқын күш қажет», - деп қосты.

Қарсы ұсыныс

Жақында Тегеран мен Вашингтон Оман арқылы ядролық келіссөздер жүргізген болатын.

Иран Сыртқы істер министрлігінің баспасөз хатшысы Исмаил Багай дүйсенбі күні АҚШ-тың «қабылданбайды» деп сипаттаған ұсынысына жауап ретінде Иран Оман арқылы АҚШ-қа ядролық келісімге қарсы ұсыныс жіберуге дайындалып жатқанын мәлімдеді.

Өткен апта АҚШ президенті Дональд Трамп Израиль премьер-министрі Беньямин Нетаньяхуға Иранмен ядролық келіссөздерге кедергі келтіретін әрекетке бармауды ескерткенін айтты.

Трамп кеңсесінде журналистерге берген сұқбатында «Мен оған дәл қазір мұны істеу дұрыс еместігін айттым, өйткені біз дәл қазір нәтижеге жақынбыз», - деді. «Бұл кез келген сәтте өзгеруі мүмкін», - деп қосты ол.

Нетаньяхумен телефон арқылы сөйлескеннен кейін Трамп журналистерге «Біз қирату және өлім болмас үшін келісім жасауға тырысудамыз. Бірақ олай болмауы да мүмкін. Жақында көреміз», - деді.