Судан әскері елдің оңтүстігінде орналасқан Батыс Кордофан уәлаятының Бабнуса қаласына Жедел қолдау күштері жасаған шабуылды тойтарғанын хабарлады.
Сейсенбі күні АҚШ-та орналасқан бір әлеуметтік медиа компаниясының мәлімдемесінде әскердің ресми өкілі ЖҚК бұрын жариялаған біржақты атысты тоқтатуға қарамастан, Бабнусаны күн сайын артиллериялық атыспен және ұшқышсыз ұшу аппараттарымен нысанаға алып отырғанын айтты.
Баспасөз өкілінің сөзінше, әскерлер дүйсенбі күні қалаға жасалған жаңа шабуылды қайсарлықпен тойтарған.
Бабнуса Төтенше Жағдай Комитетінің мәліметінше, екі жылдан бері үздіксіз ЖҚК шабуылдары салдарынан шамамен 177 000 адам қаланы тастап кеткен.
Әскер қарулы топ пен оның одақтастары жариялаған атысты тоқтатудың аймақтағы қозғалыстарды жасыруға бағытталған саяси және медиа айла екенін мәлімдеді.
ЖҚК жетекшісі Мұхаммед Хамдан Дагало 24 қарашада Суданда біржақты үш айлық атысты тоқтату жариялаған еді. Алайда ЖҚК Дарфур мен Кордофан уәлаятында бақылау аумағын кеңейтіп, бейбіт тұрғындарға шабуыл жасауды жалғастырған.
Армияның ресми өкілі халықаралық гуманитарлық құқыққа, бейбіт тұрғындарды қорғау міндетіне және гуманитарлық көмектің жеткізілуін жеңілдетуге адалдықтарын растап, гуманитарлық жағдайдың әскери әрекеттерді бүркемелеу үшін қолданылуына жол бермейтіндерін айтты.
Армияның бұл мәлімдемесіне ЖҚК тарапынан әзірге жауап берілген жоқ.
Қазіргі уақытта ЖҚК батыстағы Дарфур өңірінің бес уәлаятында толық бақылау орнатқан, тек Солтүстік Дарфурдың кейбір солтүстік аудандары ғана әскердің қолында тұр. Ал үкімет әскері Хартумды қоса алғанда, елдің оңтүстігі, солтүстігі, шығысы және орталығындағы 13 уәлаяттың басым бөлігін бақылайды.
Дүниежүзілік денсаулық сақтау ұйымының дерегінше, 2023 жылдың сәуір айында басталған әскер мен ЖҚК арасындағы қақтығыстар кемінде 40 000 адамның өліміне, сондай-ақ 12 миллион адамның босқынға айналуына себеп болған.
