Лачын халықаралық әуежайы Әзербайжанның 2020 жылы Армениямен болған соғыс кезінде азат етілген аумақтарда салған үшінші әуежайы болмақ.
Теңіз деңгейінен 1 800 метр биіктікте орналасқан бұл әуежай таулы аймақтың тастары қопарылып, алаңы тегістеліп салынған. Лачын — Әзербайжандағы ең биік нүктедегі әуежай.
2021 жылы құрылысы басталған әуежай Лачын қаласының орталығынан 30 шақырым, Шушадан 70 шақырым, Келбежерден 60 шақырым қашықтықта орналасқан. Ұшу-қону жолағының ұзындығы 3 000 метр, ені 60 метр. Терминал ғимараты болса сағатына 200 жолаушыға қызмет көрсетуге арналған.
Қарабахтағы үшінші халықаралық әуежай
Әзербайжан премьер-министрі Әли Асадовтың 26 мамырда қол қойған жарлығымен Лачын әуежайына халықаралық әуежай мәртебесі берілді. Бұл мәртебеге қатысты ақпарат халықаралық ұйымдарға да жолданды. Осылайша Әзербайжандағы халықаралық әуежайлар саны тоғызға жетті.
Бұған дейін Әзербайжанның азат етілген аумақтарында салынған алғашқы әуежай — Физули халықаралық әуежайы — 2021 жылдың 26 қазанында Ердоған мен Әлиевтің қатысуымен ашылған болатын.
Екі көшбасшы сондай-ақ 2022 жылдың 20 қазанында Зенгилан халықаралық әуежайының ашылу рәсіміне қатысқан еді.
