Ресми өкілдердің мәлімдеуінше, Үндістанның батысындағы Махараштра штаты премьер-министрінің орынбасары сәрсенбі күні таңертең болған ұшақ апатынан қаза тапты.
«All India Radio» мемлекеттік телерадиокомпаниясының хабарлауынша, Аджит Павар мен тағы төрт адамды тасымалдаған ұшақ Махараштраның Барамати қаласында құлаған.
Ұшақ бортында Павардан бөлек экипаждың екі мүшесін қосқанда тағы төрт адам болған. Алдын ала мәліметтер бойынша, ешкім аман қалмаған.
Премьер-министр Нарендра Моди Павардың «мезгілсіз қазасы өте ауыр, әрі қайғылы» екенін айтты.
Моди “X” желісіндегі мәлімдемесінде «Махараштра халқына қызмет етуде алдыңғы шепте жүрген, еңбекқор тұлға ретінде Павар үлкен құрметке ие еді... Оның отбасы мен сансыз қолдаушысына көңіл айтамын», — деді.
Сондай-ақ Моди «Апатта жақындарынан айырылғандардың барлығына ортақтасып қайғырамын», — деп қосты.
Куәгерлердің видеосында ашық алаңға шашылып қалған, жанып жатқан ұшақ үйінділерінен көкке көтерілген қою түтін көрінеді.
Үнді БАҚ-тарының хабарлауынша, Павар мінген ұшақ Үндістанның қаржы орталығы Мумбайдан ұшып шығып, штаттың Барамати қаласына шұғыл қонбақ болған.
