АҚШ президенті Дональд Трамп «Егер Демократиялық партиядан Нью-Йорк қаласы мэрі лауазымына үміткер Зохран Мамдани мэр болып сайланғаннан кейін дұрыс шешімдер қабылдамаса, онда Нью-Йорк қаласын федералдық қаржыландырудан айырамын»,- деп ескертті.
Бұл ескертуді Трамп жексенбі күні «Fox News» арнасына берген сұхбаты кезінде жасады. Ол 24 маусымда Демократиялық партиядан мэр лауазымына ресми үміткер атанған Мамданиді нысанаға алды.
Трамп: «Егер ол сайланса, мен президентпін, ал ол дұрыс әрекет етуге мәжбүр болады, әйтпесе қаражат ала алмайды. Ол дұрыс шешім қабылдауы тиіс», - деді.
Трамп бұл ескертуін кез келген болашақ Нью-Йорк мэріне бағыттап, «Нью-Йорк мэрі кім болса да, тәртіппен жүруі керек, әйтпесе федералдық үкімет оларға қаржылық жағынан өте қатал болады», - деді.
Трамп бұған дейін де түрлі штаттар мен университеттерді өз саясатына қарсы келген жағдайда федералдық қаржыландырудан айырамын деп қорқытқан болатын.
Сондай-ақ Мамданиді «коммунист» деп атап, оның жеңісіне таңғалғанын жасырмады.
«Ол - коммунист. Бұл Нью-Йорк үшін өте жаман деп ойлаймын. Бұл - таңғаларлық. Мен бұрын бұл елде ешқашан социалист болмайды деп айтатынмын, жоқ, енді бізде коммунист болайын деп тұр», - деді Трамп.
Зохран Мамдани сейсенбі күні өткен праймеризде Нью-Йорктың бұрынғы губернаторы Эндрю Куомоны жеңіп, қаланың тұңғыш мұсылман мэрі болу жолында ілгерлеуде.
Мамдани - Палестинаға ашық қолдау көрсетіп, Израильді сынайтын белсенді. Ол «Bowdoin College»-де «Палестина үшін әділет» студенттік ұйымының кампустағы бөлімшесін құрған және 2023 жылы Газа секторында атысты тоқтатуды талап етіп, Ақ Үй алдында өткен аштық жариялау шарасына қатысқан.
