Хаменеидің Израиль мен АҚШ-тың әскери соққыларынан қаза тапқаны туралы хабардан кейін жексенбі күні бүкіл елде наразылық шаралары басталды. Бұл оқиға Таяу Шығыстағы шиеленісті одан әрі өршітіп, Иран ішінде ауқымды қоғамдық реакция тудырды.
Иран мемлекеттік телеарнасы Хаменеидің АҚШ-Израиль шабуылында қаза тапқанын растап, «Ислам революциясы көсемінің шейіттік деңгейге жеткенін» жариялады. Үкімет 40 күндік ұлттық аза тұту және жеті күндік ресми демалыс жариялау туралы шешім қабылдады.
Хаменеидің қазасы туралы хабардан соң елдің көптеген қаласында халық көшеге шықты. Иран БАҚ-тары Иран туларын ұстаған шерушілердің қала орталықтарына жиналып, қайғыларын білдіріп жатқанын хабарлады.
Тегеранда жүздеген адам «Инқилаб» (Революция) алаңына жиналды. Шерушілер Хаменеидің суреттерін ұстап, АҚШ пен Израильді айыптайтын ұран тастады.
Құм қасиетті қаласында жүздеген адам Әзірет Масуме кесенесіне жиналып, шабуылдарға наразылық білдірді.
Мешхедте аза тұтушылар елдегі ең маңызды діни орындардың бірі — Имам Риза кесенесінің күмбезіне қара ту іліп, символикалық аза тұту рәсімін өткізді. Кесене маңында көптеген адамның көз жасына ерік бергені байқалды.
Хаменеидің отбасы мүшелері де қаза тапты
Билік өкілдері сенбі күні таңертең ерте жасалған шабуыл Хаменеи Тегерандағы кеңсесінде болған кезде нысанаға алғанын мәлімдеді. Иран мемлекеттік БАҚ-тары Хаменеидің «жер астында жасырынып жүрді» деген қауесеттерді теріске шығарып, шабуыл сәтінде оның «қызмет бабында және халықтың арасында» болғанын баса айтты. Оның өлімін өмір бойы атқарған қоғамдық лидерлік рөлінің көрінісі деп сипаттады.
Ирандық дереккөздер Хаменеидің қызы, күйеу баласы, немересі және келінін қоса алғанда, кейбір отбасы мүшелерінің де шабуылда қаза тапқанын хабарлады.
Соққылар кезінде бейбіт тұрғындар да ажал құшты. Иран Қызыл Жарты ай қоғамы шабуылдар нәтижесінде 201 адамның қаза тапқанын, 747 адамның жараланғанын мәлімдеді.
