АҚШ армиясы Кариб теңізінде қайыққа шабуыл жасады
Шабуыл АҚШ армиясы әскери кемелер мен ұшақтар арқылы Иранды қарқынды түрде бомбалап жатқан кезеңде болды.
Ресми тұлғалардың мәліметінше, АҚШ армиясы Кариб теңізінде есірткі тасымалдады деп күдікке ілінген қайыққа соққы жасап, ондағы төрт адамды өлтірген.
АҚШ-тың Оңтүстік қолбасшылығы сәрсенбі күні «X» желісіндегі мәлімдемесінде бұл кеменің Кариб аймағындағы есірткі тасымалы бағыттары бойымен жүзгенін және заңсыз есірткі саудасына қатысқанын атап өтті. Сондай-ақ «Осы операция барысында төрт нарко-террорист жойылды. АҚШ әскері зардап шеккен жоқ»,- деп хабарлады.
Америка Құрама Штаттары қыркүйек айының басынан бері Кариб теңізі мен Тынық мұхитының шығыс бөлігінде заңсыз тасымал жасады деп күдікке ілінген қайықтарды нысанаға ала бастады. Соңғы шабуылдан кейін қаза тапқандар саны кемінде 163 адамға жетті.
Дональд Трамп әкімшілігі Латын Америкасында әрекет ететін және өздері «нарко-террористер» деп атайтын топтармен соғыс жағдайында екенін мәлімдеді.
Алайда Трамп әкімшілігі нысанаға алынған қайықтардың шынымен есірткі тасымалымен байланысы бар екеніне жеткілікті дәлел келтірмеген.
Сыншылар бұл қайықтарға жасалған шабуылдардың заңды екеніне күмән келтіріп, мұны сотсыз жазалау деп бағалады.
Бұл операциялар АҚШ әскері Таяу Шығыста Иранға қарсы әскери кемелер мен ұшақтар арқылы шабуылдарын жалғастырып жатқан тұста жүргізілуде. Сонымен қатар 82-әуе-десанттық дивизияның теңіз жаяу әскерлері мен сарбаздарын аймаққа орналастыруға дайындық жүріп жатқаны хабарланды.