Сыртқы істер министрлігіндегі дереккөздерден алынған ақпаратқа қарағанда, Түркия Республикасының Сыртқы істер министрі Хакан Фидан Хамас Шура кеңесінің төрағасы Мұхаммед Даруиш бастаған Хамас делегациясымен кездесу өткізді.
Кездесуде Газада тұрақты бейбітшілік орнату үшін жалғасып жатқан жұмыстар, Газаға гуманитарлық көмек жеткізу бойынша жүргізіліп жатқан іс-шаралар және аймақтағы басқа да өзгерістер талқыланды.
Сыртқы істер министрі Фидан аймақтағы соғыстың Палестина мәселесінің ұмытылып кетуіне жол бермеуі керектігін, Түркияның Газа мен Батыс Шерияда Израиль себеп болған апаттарды халықаралық қауымдастықтың күн тәртібінде ұстап тұруды жалғастыратынын білдірді.
Министр Фидан Израильдің Газадағы әскери күшін арттыруы және Газаға аса қажетті гуманитарлық көмектің аймаққа жетуіне кедергі жасауы қабылданбайтын жайт екенін атап өтті.
Палестинаға қолдау көрсететін Ислам елдері бастаған барлық мемлекеттің Палестина халқының әділ күресін қорғауды жалғастыруы қажеттігін баса айтқан министр Фидан Түркияның бұл бағыттағы күш-жігерге жетекшілік етуді жалғастыратынын мәлімдеді.
Ол Түркияның Палестина халқының Газадан көшірілуін мақсат тұтатын кез келген қадамға қарсы табанды түрде күресуді жалғастыратынын жеткізді.
