Әскери дереккөздің «AFP» агенттігіне хабарлауынша, Колумбияның оңтүстігінде 125 адамды тасымалдаған әскери ұшақтың апатқа ұшырауы салдарынан кемінде 66 адам қаза тауып, көптеген адам жарақат алған.

«Hercules C-130» ұшағы Эквадордың оңтүстік шекарасына жақын Пуэрто-Легисамо қаласынан ұшып шыққаннан кейін көп ұзамай құлаған. Өртке оранған ұшақ қалдықтары орманды аумаққа шашылған.

Колумбия Әуе күштеріне тиесілі ұшақ Пуэрто-Легисамо мен Амазон аймағындағы басқа бір әскери бекетке 114 әскери қызметкер мен 11 экипаж мүшесін апара жатқан.

Генерал Карлос Фернандо Сильва Руэда борттағы адамдардың жалпы санын растады. Билік өкілдерінің мәліметінше, апаттан әзірге 48 адам құтқарылған, ал 21 адамның жағдайы әзірге белгісіз.

Мемлекет басшысы Густаво Петро алғашқы мәлімдемесінде апаттың себебі әзірге белгісіз екенін айтты.

Қорғаныс министрі Педро Санчес бұл қайғылы оқиғаға байланысты қатты қайғырғанын айтып, зардап шеккендерге көмек көрсету үшін арнайы топтың жіберілгенін мәлімдеді.

Ол «X» әлеуметтік желісінде «Зардап шеккендердің отбасыларына көңіл айтамын және ресми ақпарат шыққанға дейін алып-қашпа әңгімелерден аулақ болуды сұраймын», – деп жазды.

Оқиға орнынан түсірілген кадрларда ағаштардың үстінен түтін мен жалын көтеріліп жатқан сәтте тұрғындардың ұшақтың сынған артқы бөлігі маңында жүргені көрінеді.

Соңғы апталарда бұл шекаралық аймақта Колумбия мен Эквадор күштері есірткі тасымалымен айналысатын картельдерге қарсы күрес жүргізіп, әскери белсенділік күшейген.

Бұл апат Оңтүстік Америкада соңғы бір ай ішінде «C-130 Hercules» ұшақтарының қатысуымен болған екінші апат ретінде тіркелді.

27 ақпанда Ла-Пас маңында Боливияға тиесілі әскери жүк ұшағы құлап, кемінде 24 адам қаза тапқан болатын.

«Hercules C-130» — америкалық «Lockheed Martin» компаниясы шығарған төрт қозғалтқышты турбовинтті ұшақ. Ол уақытша әуежайлардан ұшып-қона алу мүмкіндігімен танымал және әлемнің көптеген елінің қарулы күштері кеңінен қолданады.