Ұлыбритания кем дегенде 12 ядролық қару тасымалдауға қабілетті «F-35A» жойғыш ұшағын сатып алып, НАТО-ның әуедегі ядролық миссиясына қосылуды жоспарлауда.

Ресми дереккөздердің хабарлауынша, премьер-министр Стармер сәрсенбі күні Нидерландыда өтетін НАТО саммитінде бұл туралы мәлімдеме жасап, мүше мемлекеттерді одақтағы міндеттемелерін күшейтуге шақырады деп күтілуде.

«F-35A» ұшағы негізгі қару-жарақты тасымалдау мүмкіндігіне ие, қажет болған жағдайда АҚШ-та жасалған ядролық бомбалармен де жабдықталады.

Американың «Lockheed Martin» компаниясы шығарған бесінші буын «F-35A» жойғыш ұшағы - әлемдегі ең озық, әрі ең қымбат ұшақтардың бірі.

«Белгісіздік дәуірінде біз енді бейбітшілікті кепіл деп қабылдай алмаймыз. Сондықтан үкіметіміз ұлттық қауіпсіздігімізге инвестиция салуда», - деді Стармер.

Даунинг-стрит бұл қадамды «Ұлыбританияның ядролық ұстанымындағы ең ірі күшею» деп сипаттады.

«Ұлыбританияның НАТО алдындағы міндеттемесі, сондай-ақ одақтың Ұлыбританияның қауіпсіздігін сақтауға қосқан үлесі сөзсіз. Алайда біз еуроатлантикалық аумақты болашақ ұрпаққа сақтау үшін көбірек жұмыс істеуіміз керек», - деді Стармер.

Сонымен қатар Стармер бұл қадам 100 кәсіпорынға пайда әкелетінін және ел бойынша 20 000 жұмыс орнын қамтамасыз ететінін айтты. Бұл әлемдегі көшбасшы Ұлыбритания әуе күштері үшін жаңа дәуір деп сипаттады.

НАТО Бас хатшысы Марк Рютте бұл мәлімдемені «Ұлыбританияның НАТО-ға қосқан тағы бір үлкен үлесі» деп атады.