Түркиядан Қазақстанға барған 5 комбустиолог маман Алматыда өткен оқу бағдарламасы аясында қазақстандық 40 комбустиологқа заманауи емдеу және хирургиялық әдістер бойынша дәріс өткізіп, операциялар барысында өзара тәжірибе алмасты.
Түрік ынтымақтастық және үйлестіру агенттігінің (TİKA) қолдауымен, Медицина ғылымдары университеті мен Қазақстанның Ұлттық медицина қауымдастығының бірлесіп ұйымдастыруымен өткен «Комбустиология бойынша оқыту» бағдарламасы сертификат табыстау рәсімімен аяқталды.
Алматыдағы Балаларға шұғыл медициналық көмек көрсету орталығында ұйымдастырылған бағдарламаға Қазақстанның әр өңірінен 40 комбустиолог қатысты.
Түркиядан келген тәжірибелі 5 дәрігер оқу барысында күйікті бағалау және емдеу, хирургиялық тәсілдер, жараны емдеу, тері трансплантациясы, науқасты қадағалау және осы саладағы заманауи әдістер бойынша теориялық және тәжірибелік сабақтар өткізді.
Бағдарлама аясында теориялық біліммен қатар тәжірибелік операциялар да жүргізілді. Түркиялық және қазақстандық мамандар операцияларға бірге қатысып, науқастардың жағдайын бағалады, клиникалық жағдайлар бойынша пікір алмасты және науқастарға кеңес берді.
Бағдарлама барысында түрлі дәрежедегі күйіктерді хирургиялық жолмен емдеу, жараны емдеу тәсілдері және реконструктивті хирургия әдістеріне ерекше назар аударылды. Сонымен қатар мамандар арасында өзара білім мен тәжірибе алмасу жүзеге асты.
TİKA күйікті емдеу, жараны күту және тері трансплантациясы кезінде қолдануға арналған заманауи медициналық жабдықтарды Балаларға шұғыл медициналық көмек көрсету орталығына табыстады.
