Израиль әскері сейсенбі күні жасалған үш заңсыз әрекеттен кейін Сирияның Кунейтра ауылдық аймағына тағы бір рет заңсыз кіріп, елдің егемендігін бұзды.
Сирияның мемлекеттік «Al-Ikhbariya» телеарнасының хабарлауынша, Израиль күштері Расм әл-Кита ауылына бет алып, онда әскери бақылау-өткізу бекетін орнатты. Нәтижесінде тұрғындардың қозғалысы шектелді.

Сирияның ресми «SANA» ақпарат агенттігі де Израиль әскері Әбу Гара ауылы мен Суэиса қыстағын жалғайтын жолда тағы бір бақылау бекетін орнатқанын хабарлады. Аталған ақпаратқа байланысты Израиль армиясы да, Сирия билігі де ешқандай түсініктеме берген жоқ. Сейсенбі күні Израиль әскері ауылдық аймаққа үш рет басып кіріп, Ум Батина мен Жаба ауылдарының арасына әскери бақылау бекетін орнатып, жолдан өткен азаматтарды тексерген болатын.

Кунейтрада шиеленістің күшеюі

Израильдің Кунейтраға басып кіру әрекеттері соңғы уақытта жиілеп кетті. Жергілікті тұрғындар Израиль әскерлерінің егіс алқаптарына қарай жылжып бара жатқанын, жүздеген гектар орманның жойылғанын, азаматтардың ұсталып жатқанын және жаңа әскери бақылау бекеттерінің орнатылып жатқанын айтып шағымдануда.

Израиль армиясы бірнеше рет Сирия аумағына өтіп, әуе шабуылын жасады. Бұл шабуыл салдарынан бейбіт тұрғындар қаза тапты. Сондай-ақ Сирия армиясына тиесілі әскери бекіністер, техникалар, қару-жарақ пен оқ-дәрі қоймалары жойылды.

Сирия президенті Ахмед Шара бұған дейін Израиль армиясының Башар Асад режимі құлағаннан бері 1 000-нан астам әуе шабуылын, 400-ден астам заңсыз кіру әрекетін жасағанын мәлімдеген болатын.