Мемлекетке қарасты «National News» агенттігінің хабарлауынша, Израильдің ұшқышсыз ұшағы Ливанның оңтүстігіндегі Набатия уәлаятына қарасты Аттиры кентінде бір көлікке екі зымыран атқан. Сол сәтте жанынан өтіп бара жатқан мектеп автобусындағы бірнеше оқушы жараланған.
Агенттіктің дерегіне сәйкес, сәрсенбі таңертең болған шабуыл кезінде мектеп автобусы нысанаға алынған көліктің артынан жүріп келе жатқан. Шабуыл салдарынан бірнеше оқушы мен автобус жүргізушісі жарақат алған.
Агенттік жараланған оқушылардың нақты саны мен жағдайы туралы мәлімет бермеді.
Бұл шабуылдан бірнеше сағат бұрын дәл сол күні Ливанның оңтүстігіндегі Саида қаласында орналасқан Айн әл-Хилуэ палестиналық босқындар лагеріне жасалған Израиль әуе соққысы кемінде 13 адамның өмірін қиған болатын.
Израиль армиясы соққының лагерь ішіндегі бір орталықты және ондағы Хамас мүшелерін нысанаға алғанын алға тартты.
Армия нысанаға алынған ғимарат Израильге қарсы шабуылдарды жоспарлау үшін пайдаланылған деп мәлімдесе, палестиналық тойтарыс тобы бұл айыптауды жоққа шығарды.
Израиль армиясы Хезболла мүшелері мен инфрақұрылымын нысанаға алғандарын алға тартып, Ливан аумағына әуе шабуылдарын күшейтті. Ливанның оңтүстігіндегі шиеленіс бірнеше аптадан бері жалғасуда.
Израиль әскері 2023 жылдың қазанында басталып, 2024 жылдың қыркүйегінде шабуылға айналған операциялар барысында Ливанда 4 мыңнан астам адамды өлтірді. Шамамен 17 мың адам жараланды.
Израиль әскері 2024 жылдың қарашасында жарияланған бітім бойынша осы жылдың қаңтарында Ливанның оңтүстігінен толық шығуы тиіс болған. Алайда Израиль тек ішінара шегінумен шектеліп, шекара бойындағы бес бақылау бекетінде әлі де әскери күшін ұстап отыр.
