Беларусь Сыртқы істер министрі Максим Рыженков Қырғызстанмен сауда айналымын 500 миллион долларға жеткізуді мақсат етіп отырғандарын хабарлады.
Максим Рыженков ресми сапармен Қырғызстанға барып, әріптесі Жээнбек Кулубаевпен кездесті.
Беларусь премьер-министрі Александр Турчиннің таяуда Қырғызстанға сапарынан кейін екі ел арасындағы сауда айналымын кемінде 500 миллион долларға жеткізу міндеті жүктелгенін атап өткен Рыженков осы мақсат бағытында жұмысты бастайтындарын баса айтты.
Рыженков маусым айында Бішкекте екі елдің үкімет басшыларының қатысуымен өткен бизнес-форумда құны шамамен 5 миллион долларды құрайтын 20 коммерциялық келісім мен шартқа қол қойылғанын еске салды.
Қырғызстанның Біріккен Ұлттар Ұйымындағы жетістігі мен уақытша мүшелік процесін тарихи жеңіс деп бағалаған Рыженков бұл нәтижеге жету үшін жүргізілген белсенді жұмыстар ұйымның институттық негіздерін нығайтып, қақтығыстарды бейбіт жолмен шешуге үлес қосатынын білдірді.
Рыженков сондай-ақ Беларусьтің Қырғызстанда өтетін 6-шы Дүниежүзілік көшпенділер ойындарына белсенді түрде қатысатынын айтты.
Қырғызстан Сыртқы істер министрі Кулубаев та соңғы екі жылда екі ел арасында түрлі салаларда 27 құжатқа қол қойылғанын еске салып, соңғы үш жылда сауда айналымы екі есеге артып, 206 миллион долларға жеткенін атап өтті.
